نەبارى 38 جىل عانا ءومىر سۇرگەن اقىننىڭ تۇرمىستا قولدانعان زاتتارى وسى مۇراجايدا ساقتاۋلى، دەپ حابارلايدى قازاقپارات ءتىلشىسى. سارا تاستانبەك قىزىنىڭ قولىنا العاش ۇستاعان دومبىراسى، تىگىن ماشيناسى، قايشىسى جانە تۇرمىستا قولدانعان قارا قازانى مۋزەيدە تۇر. قازىر وسى ءتورت زات مۇراجايداعى ەڭ قۇندى جادىگەر بولىپ سانالادى.
«مەموريالدى مۋزەي 1993 -جىلى سارا تاستانبەك قىزىنىڭ 115 جىلدىعىنا وراي اشىلدى. اقىن سارانىڭ مۋزەيى ورنالاسقان عيماراتتىڭ وزىندىك تاريحى بار. بۇل عيمارات قاپال ۋەزى بولعان كەزدە باس دارىگەر سوبوليەۆسكي دەگەن كىسىنىڭ ەمحاناسى بولدى. ءتىپتى ءوزىنىڭ ساپارلارىندا شوقان ءۋاليحانوۆ وسى جەرگە ايالداپ، ەم العان دەگەن دەرەكتەر دە بار» ، - دەدى س. تاستانبەك قىزى اتىنداعى مەموريالدى مۋزەيدىڭ مەڭگەرۋشىسى ايگۇل الىمبايەۆا.
جالپى مۇراجاي ءتورت بولىمنەن تۇرادى. ءتورت ءبولىم دە بەس بالانى دۇنيەگە اكەلگەن سارانىڭ ءومىرى مەن شىعارماشىلىعىنان سىر شەرتەدى. ءبىرىنشى ءبولىم - سارا تاستانبەك قىزىنىڭ بالالىق شاعىنا، ەكىنشى ءبولىم - ونىڭ وسكەن ورتاسىنا، ءۇشىنشى ءبولىم - شىعارماشىلىعىنا جانە ءتورتىنشىسى اقىننىڭ ءىزباسارلارى مەن ۇرپاقتارىنا ارنالعان.
مۇراجايدا 700 دەن استام ەكسپونات بار. قاپال جەرىندە 1878 -جىلى دۇنيەگە كەلگەن اقىن سارانىڭ كەسەنەسى دە وسى اۋىل ماڭىندا ورنالاسقان. كوپتەگەن تۋريستەر كەسەنەگە ارنايى بارىپ، باسىنا قۇران باعىشتاپ تۇرادى.
اۆتور: سامال قابىشيەۆا