700 ميلليون تەڭگە جىمقىرعان: شىمكەنتتە ءال-فارابي اۋدانى اكىمىنىڭ اپپارات جەتەكشىسى سوتتالدى

استانا. KAZINFORM - شىمكەنت قالاسىنىڭ قىلمىستىق ىستەر جونىندەگى اۋدانارالىق سوتىندا كەزەكتى قىلمىستىق ءىس قارالدى.

اتاپ ايتساق، م. ەسىمدى ازامات قىزمەت بابىن پايدالانا وتىرىپ اسا ءىرى مولشەردە سەنىپ تاپسىرىلعان مۇلىكتى ءبىر توپ اداممەن الدىن الا ءسوز بايلاسۋ ارقىلى ىسىراپ ەتكەن (ق ك- ءنىڭ 189-بابى 4-بولىگى 2-تارماعى).

ال، سىبايلاستارى ك. مەن ب. -عا اسا ءىرى مولشەردە بوتەننىڭ مۇلكىن ءبىر توپ اداممەن ۇرلاۋ، اسا ءىرى مولشەردە سالىق تولەۋدەن جالتارۋ جانە قۇجاتتاردى قولدان جاساۋ سياقتى ايىپتار (ق ك- ءنىڭ 189-بابى 4-بولىگى 2-تارماعى)، 28-بابى 3-بولىگى - 245-بابى 2-بولىگى 1، 2-تارماقتارى)، 385-بابى 2,3-بولىكتەرى) تاعىلدى.

سوت ماتەريالدارىنا كوز جۇگىرتسەك، م. 2019 -جىلى شىمكەنت قالاسى ءال-فارابي اۋدانى اكىمى اپپاراتىنىڭ باسشىسى بولعان ۋاقىتتا قىزمەت بابىن پايدالانا وتىرىپ، الدىن الا ءسوز بايلاسۋ ارقىلى ج ش س ديرەكتورى ب. جانە قۇرىلتايشىسى ك. بىرگە قىلمىستىق ماقساتتا اكىمدىكتىڭ بيۋدجەت قاراجاتىن جىمقىرۋدى ويلاستىرعان.

اتاپ ايتساق، ولار تۇرعىن ءۇي اۋلالارىن اباتتاندىرۋعا ارنالعان سمەتالىق قۇجاتتارداعى (قوقىس جاشىكتەرى، شاعىن كۇركەلەر، ورىندىقتار، ويىن جانە جاتتىعۋ الاڭدارى) ماتەريالداردىڭ قۇنىن ءوز باعاسىنان اسىرا وتىرىپ ازىرلەپ، شامامەن 700 ميلليون تەڭگە كولەمىندە سەنىپ تاپسىرىلعان مۇلىكتى ىسىراپ ەتكەن.

ك. ۇيىمداستىرۋشى رەتىندە ب. -مەن بىرگە دەكلاراتسيالارعا بۇرمالانعان دەرەكتەردى ەنگىزۋ ارقىلى سالىق تولەۋدەن جالتارۋدى ۇيىمداستىرىپ، مەملەكەتكە 194 ميلليون تەڭگەدەن استام زيان كەلتىرگەن.

سونىمەن قاتار، ب. سالىق ورگاندارى الدىنداعى قارىزىن جاسىرۋ ماقساتىندا 130 ميلليون تەڭگەدەن استام سوماعا بانك كەپىلدىگىن جاساۋ ءۇشىن بانك فيرمالىق بلانكىن قولدان جاساعان.

وسىنداي فاكتىلەردى العا تارتقان پروكۋرور سوتتالۋشىلارعا 8 جىل باس بوستاندىعىنان ايىرۋ جازاسىن تاعايىنداۋدى سۇرادى. ال، جابىرلەنۋشىلەردىڭ وكىلدەرى زاڭعا سايكەس جازا تاعايىندالسا، سول ءادىل شەشىم بولاتىنىن جەتكىزدى.

سوتتالۋشىلار بولسا، ءوز كىنالارىن مويىنداماي، سوتتان وزدەرىن اقتاۋدى سۇرادى.

ايتا كەتەيىك، زاڭ بويىنشا سىبايلاس جەمقورلىق قىلمىسى ءۇشىن نەگىزگى جازا رەتىندە 7 جىلدان 12 جىلعا دەيىنگى مەرزىمگە باس بوستاندىعىنان ايىرۋ كوزدەلگەن.

سوتتالۋشىلاردىڭ كىناسى سوتتا زەرتتەلگەن دالەلدەرمەن دالەلدەندى. سوت جەڭىلدەتەتىن ءمان- جايلاردى ەسكەرە وتىرىپ - كامەلەتكە تولماعان بالالارىنىڭ بولۋىنا بايلانىستى، ءارقايسىسىنا قىلمىستىق قۇقىق بۇزۋشىلىقتاردىڭ جيىنتىعى بويىنشا 8 جىل باس بوستاندىعىنان ايىرۋ جازاسىن تاعايىنداپ، م. -نى ءومىر بويىنا مەملەكەتتىك قىزمەتتە لاۋازىمداردى اتقارۋ قۇقىعىنان ايىردى.

اۆتور

ورالحان قوجانوۆ