مەكتەپتەردە 7- جانە 9- مامىرعا ارنالعان جيىن وتپەيدى - ب ع م

نۇر-سۇلتان. قازاقپارات - بيىل مەكتەپتەردە 7- جانە 9- مامىرداعى مەرەكەلەرگە وراي جيىن وتكىزۋ جوسپارى جوق، دەپ حابارلايدى قازاقپارات ق ر ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ.

«مەكتەپتەردە 7- جانە 9- مامىردا اتالىپ وتەتىن مەرەكەلەر قارساڭىندا پاتريوتتىق تاربيە بەرۋ، سوعىس ارداگەرلەرىنىڭ جەڭىسكە قوسقان ۇلەسى، وتانعا دەگەن سۇيىسپەنشىلىك، ىزگىلىك، بەيبىتشىلىك پەن كەلىسىمنىڭ ماڭىزدىلىعى تاقىرىپتارىندا سىنىپ ساعاتتارى وتكىزىلەدى. مەكتەپتەردە 9- مامىرعا ارنالعان جيىن وتكىزۋ جوسپارلانىپ وتىرعان جوق» دەلىنگەن حابارلامادا.

سونداي-اق، اتالعان ۆەدومستۆودان اسكەري كيىم مەن اتريبۋتتاردى قولدانىپ، تەاترلاندىرىلعان كورىنىس قويۋدىڭ قاجەت ەمەستىگى ايتىلدى.

«ءبىلىم بەرۋ ۇيىمدارىنا وسى ماسەلە بويىنشا ۇسىنىستار جىبەرىلدى»، - دەيدى باسپا ءسوز قىزمەتى.

ەسكە سالا كەتسەك، تاياۋدا قورعانىس مينيسترىلىگى بيىل جەڭىس كۇنىنە ارنالعان اسكەري پارادتىڭ وتپەيتىنىن حابارلادى. كەيىن ونىڭ سەبەبى ءتۇسىندىرىلدى.

ال بۇگىن قورعانىس ءمينيسترى رۋسلان جاقسىلىقوۆ ءبىر اسكەري پاراد وتكىزۋگە شامامەن 4 ميلليارد تەڭگە جۇمسالاتىنىن جەتكىزدى. سونداي-اق، نۇر-سۇلتاندا 7- جانە 9- مامىر كۇندەرى مەرەكەلىك وتشاشۋدىڭ بولمايتىنى ايتىلدى.