استانا اۋەجايىنىڭ وتكىزۋ قابىلەتى جىلىنا 7,7 ميلليون جولاۋشىعا دەيىن ارتادى

استانا. قازاقپارات - بۇگىن ق ر پرەمەر- ءمينيسترىنىڭ ءبىرىنشى ورىنباسارى اسقار مامين استانا قالاسىنداعى حالىقارالىق اۋەجايدىڭ قۇرىلىس جۇمىستارىن تەكسەرىپ، جاڭا تەرمينالدى سالۋ جانە ۇشۋ- قونۋ جولاعىن قايتا جوندەۋ بارىسىمەن تانىستى. بۇل تۋرالى primeminister.kz حابارلادى.

«نۇرلى جول» مەملەكەتتىك باعدارلاماسى اياسىندا سالىنىپ جاتقان نىسان ەلوردانىڭ اۋە ايلاعىنىڭ وتكىزۋ قابىلەتىن جىلىنا 3 ميلليوننان 7,7 ميلليون جولاۋشىعا دەيىن ارتتىرۋعا مۇمكىندىك بەرەدى، بۇل اسىرەسە ەكسپو-2017 قارساڭىندا وزەكتى.

قۇرىلىس كەستەگە ساي ءجۇرىپ جاتىر، اۋەجايدىڭ جاڭا تەرمينالىنىڭ قاڭقاسى تۇرعىزىلدى، شاتىر جۇمىستارى اياقتالدى، قاسبەتتى، ينجەنەرلىك كوممۋنيكاتسيالاردى مونتاجداۋ، عيماراتتى ىشكى ارلەۋ، پەرروندى قۇرۋ جۇمىستارى جۇرگىزىلىپ جاتىر.

نىسان جاڭا تەحنولوگيالارمەن جابدىقتالعان، بۇل قىزمەت كورسەتۋدى ايتارلىقتاي جاقسارتىپ، اۆياتسيالىق قاۋىپسىزدىكتى ارتتىرادى.

اتالعان نىسان قۇرىلىسىن 2017 -جىلدىڭ ءبىرىنشى توقسانىنىڭ سوڭىندا اياقتاۋ جوسپارلانعان.