ءوزىن ورتەمەك بولعان پروكۋروردىڭ كومەكشىسى 7,5 جىلعا سوتتالۋى مۇمكىن
07:20, 08 - اقپان 2017
اتىراۋ. قازاقپارات - اتىراۋدا ءوزىن-ءوزى جاعىپ جىبەرمەك بولعان وبلىس پروكۋرورىنىڭ كومەكشىسى لەيلا سمادياروۆا 7,5 جىلعا باس بوستاندىعىنان ايىرىلۋى مۇمكىن، دەپ حابارلايدى «قازاقپارات» ح ا ا ءتىلشىسى.
«سوتتان سمادياروۆانى جەتى جارىم جىلعا باس بوستاندىعىنان ايىرۋدى جانە جازاسىن وتەۋدى كامەلەتكە تولماعان بالاسى 14 جاسقا تولعانعا دەيىن كەيىنگە شەگەرۋدى سۇرايمىن»، - دەدى سوت وتىرىسىندا مەملەكەتتىك ايىپتاۋشى باۋىرجان ەڭسەگەنوۆ.
سوت وتىرىسى جالعاسۋدا. ەسكە سالايىق، 2017-جىلدىڭ 31- قاڭتارى كۇنى لەيلا سمادياروۆا ءوزىن-ءوزى ورتەپ جىبەرۋگە ارەكەت جاسادى. ونىڭ بەتى مەن اياعىن كۇيىك شالدى.
دارىگەرلەر ايەلدىڭ ومىرىنە قاۋىپتىڭ جوقتىعىن ايتتى. كەيىن اتىراۋ وبلىسىنىڭ پروكۋراتۋراسى ءوز قىزمەتكەرلەرىنىڭ بۇل ارەكەتىنە تۇسىنىكتەمە بەردى. لەيلا سمادياروۆا 2016-جىلدىڭ تامىزىندا ءۇي قاماققا الىنعان بولاتىن. وعان 3 ميلليون تەڭگە كولەمىندە پارا الدى دەگەن ايىپ تاعىلعان. سمادياروۆا بولسا، وزىنە تاعىلعان ايىپپەن كەلىسپەۋدە.