قازا بولعان ورمانشىلاردىڭ وتباسىلارىنا 7 ميلليون تەڭگەدەن، ءار بالاعا 2 ميلليون تەڭگەدەن تولەنەدى
كەڭەس توتەنشە جاعداي كەزىندە قازا تاپقانداردى ءبىر مينۋت ۇنسىزدىكپەن ەسكە الۋدان باستالدى.
توتەنشە جاعدايلار ءمينيسترى سىرىم ءشارىپحانوۆتىڭ بايانداۋىنشا، 11-ماۋسىم كۇنى كەشكە جەل ەكپىنى سەكۋندىنا 18 مەترگە دەيىن جەتىپ، ءورت نەگىزگى وشاقتان وڭتۇستىك باعىتتا تارالعان. اتاپ ايتقاندا، تاليتسا اۋىلىنا قاراي قالىڭ ءتۇتىن ءجۇرىپ، ورماننىڭ تومەنگى جاعى ورتەنگەن. ەلدى مەكەندى قورعاۋ ءۇشىن ءورت ءسوندىرۋ تەحنيكاسى جەدەل ىسكە قوسىلىپ، ناتيجەسىندە ءتىلسىز جاۋ اۋىزدىقتالدى.
تۇندە ءورتتى ءسوندىرۋ جۇمىستارى ءۇش باعىتتا ءجۇردى: وڭتۇستىك، باتىس جانە سولتۇستىك- شىعىس. وسىنىڭ ارقاسىندا نەگىزگى وشاق ءىس جۇزىندە قورشاۋعا الىندى. 12-ماۋسىمدا تاڭعى ساعات 06:00-دەن باستاپ ءورت ءسوندىرۋ جۇمىستارى قايتا باستالدى. قازىرگى ۋاقىتتا 1530 ادام، 320 تەحنيكا جانە 14 تىكۇشاق جۇمىلدىرىلعان.
سونىمەن قاتار اباي وبلىسىنىڭ اكىمى نۇرلان ۇرانحايەۆ قازىرگى احۋال جانە قابىلدانىپ جاتقان شارالار جونىندە باياندادى.
پرەمەر- مينيستر توتەنشە جاعداي سەبەپتەرىن انىقتاۋ جانە سالدارىن جويۋ ءۇشىن ارنايى ۇكىمەتتىك كوميسسيا قۇرىلعانىن، ونىڭ قۇرامىنا سالالىق مينيسترلىكتەر مەن قۇقىق قورعاۋ ورگاندارىنىڭ وكىلدەرى كىرگەنىن اتاپ ءوتتى.
ءاليحان سمايىلوۆ 10 كۇن ىشىندە وقيعانىڭ بارلىق ءمان- جايىن انىقتاپ، ءتيىستى قورىتىندى جاساۋدى تاپسىردى.
وعان قوسا مەملەكەت باسشىسىنىڭ اباي وبلىسىنداعى جەدەل شتاب وتىرىسىندا بەرگەن تاپسىرمالارىن ورىنداۋ ءۇشىن قازا تاپقانداردىڭ وتباسىلارىنا «قازاقستان حالقىنا» قورىنان 7 ميلليون تەڭگەدەن، سونداي- اق كامەلەتكە تولماعان ءار بالاعا 2 ميلليون تەڭگەدەن تولەنەتىن بولادى. بۇدان بولەك، قازا تاپقانداردىڭ وتباسىلارىنا جانە زارداپ شەككەندەرگە قاجەتتى قولداۋ شارالارىن كورسەتۋ ماقساتىندا ارنايى قور قۇرىلدى.
سونىمەن قاتار 40-تان استام قازاقستاندىق ج و و ورتتەن زارداپ شەككەن وتباسىلاردىڭ ستۋدەنتتەرىنە گرانتتار مەن جاتاقحانادان ورىن بەرۋگە دايىن. وعان قوسا اقىلى نەگىزدە وقيتىن ستۋدەنتتەر مەن ماگيسترانتتاردى گرانتقا اۋىستىرۋ كوزدەلگەن.
قورىتىندىلاي كەلە، پرەمەر- مينيستر ءورت وشاقتارىن ەرتە انىقتاۋ، بەينەباقىلاۋ جانە مونيتورينگ جۇيەلەرىن ەنگىزە وتىرىپ، تابيعاتتى قورعاۋ جانە ورمان مەكەمەلەرىن نورماتيۆتىك ماتەريالدىق- تەحنيكالىق جاعىنان جاراقتاندىرۋ قاجەتتىگىن اتاپ ءوتتى.
ەسكە سالايىق، 8- ماۋسىم كۇنى تۇتانعان «سەمەي» ورمانى رەزەرۆاتىنداعى ورتپەن كۇرەسكە جۇمىلدىرىلعان 14 ورمانشى قازا بولعان ەدى. اباي وبلىسى اكىمىنىڭ ورىنباسارى ديميتري گاريكوۆتىڭ ايتۋىنشا، ءورت 2 رەت تۇسكەن نايزاعايدان تۇتانعان.
پرەزيدەنت قاسىم- جومارت توقايەۆ جۇمىس ساپارىمەن اباي وبلىسىنا باردى.
12-ماۋسىم ەلىمىزدە ازا تۇتۋ كۇنى بولىپ جاريالاندى.
الاپات ورتپەن كۇرەس ءالى ءجۇرىپ جاتىر.