ءماجىلىس دەپۋتاتتىعىنا 7 پارتيادان 283 كانديدات باسەكەلەس بولادى

استانا. قازاقپارات – 19- ناۋرىزدا وتەتىن كەزەكتەن تىس ءماجىلىس سايلاۋىندا 7 پارتيادان 283 ادام پارتيالىق ءتىزىم ارقىلى 69 ماندات ءۇشىن باسەكەگە تۇسەدى.

بۇل تۋرالى ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ ايتتى، دەپ حابارلايدى قازاقپارات ءتىلشىسى.

«كەشە، 8- اقپان كۇنى ساعات 18:00 دە بارلىق وڭىردە پارلامەنت ءماجىلىسى مەن ءماسليحاتتار دەپۋتاتتىعىنا كانديداتتاردى ۇسىنۋ اياقتالدى. ورتالىق سايلاۋ كوميسسياسى سايلاۋعا بارلىق 7 ساياسي پارتيانى جىبەردى»، - دەدى ول كوميسسيا وتىرىسىندا.

ونىڭ دەرەگىنشە، بارلىق 7 ساياسي پارتيا ءماجىلىس سايلاۋىنا قاتىسۋ ءۇشىن 283 كانديداتتان تۇراتىن پارتيالىق ءتىزىمىن ورتالىق سايلاۋ كوميسسياسىنا ۇسىنعان.

«ساياسي پارتيا پارتياعا مۇشە بولماعان تۇلعانى تىزىمگە قوسۋعا قۇقىعى جوق ەكەندىگىن ەسكە سالعىم كەلەدى. پارتيالىق تىزىمگە قوسىلعان تۇلعالار سانى ساياسي پارتيالار اراكسىندا بولىنەتىن دەپۋتاتتىق مانداتتىڭ بەلگىلەنگەن سانىنان 30 پايىزعا اسىپ كەتپەۋى ءتيىس. بۇل ارى كەتكەندە 90 ادام، ودان تومەن دە بولادى. پارتيالار پارتيالىق ءتىزىم سانى قانشا بولاتىندىعىن دەربەس انىقتادى»، - دەدى كونستانتين پەتروۆ.

سونىمەن ءماجىلىس سايلاۋىنا 7 ساياسي پارتيا قاتىسادى. ونىڭ ىشىندە پارتيالىق ءتىزىم ارقىلى قازاقستان حالىق پارتياسىنان – 52، اق جول پارتياسىنان – 54، جالپىۇلتتىق سوتسيال-دەموكراتيالىق پارتياسىنان – 19، «بايتاق» جاسىلدار پارتياسىنان» - 18، «اۋىل» پارتياسىنان – 25، Respublica پارتياسىنان – 25، AMANAT پارتياسىنان - 90 كانديدات. كانديداتتاردىڭ جالپى سانى - 283. ورتالىق سايلاۋ كوميسسياسىنا كانديداتتاردىڭ اتىنان تاپسىرىلعان قۇجاتتار «سايلاۋ تۋرالى» كونستيتۋتسيالىق زاڭعا ساي كەلەدى.