ۇلتتىق بانك «7-20-25» باعدارلاماسىنىڭ كەلەشەگى تۋرالى تۇسىنىكتەمە بەردى

نۇر- سۇلتان. قازاقپارات - ۇلتتىق بانك «7-20-25» باعدارلاماسىنىڭ كەلەشەگى تۋرالى تۇسىنىكتەمە بەردى، دەپ حابارلايدى قازاقپارات ءتىلشىسى.

«7-20-25» باعدارلاماسىنىڭ ناقتى اياقتالۋ مەرزىمى جوق. بۇل باعدارلاما بويىنشا يپوتەكالىق قارىز بەرۋ 1 تريلليون تەڭگە سوماسىنداعى قارجىلاندىرۋدىڭ ينديكاتيۆتىك كولەمىنە جەتكەنگە دەيىن جالعاسادى.

وسىعان بايلانىستى باعدارلامانى اياقتاۋدىڭ ناقتى مەرزىمى تۋرالى ايتۋ مۇمكىن ەمەس. ال 2022 -جىلى باعدارلامانى اياقتاۋ مۇمكىندىگى تۋرالى اقپارات نەگىزىنەن حالىق تاراپىنان سۇرانىستى باعالاۋعا جانە وتكەن جىلدارداعى قاراجاتتى يگەرۋ قارقىنىنا نەگىزدەلگەن. يگەرىلمەگەن قاراجاتتىڭ قالدىعى ازاماتتاردىڭ ەداۋىر سانىن جەڭىلدەتىلگەن نەسيە بەرۋمەن قامتۋعا مۇمكىندىك بەرەدى»، - دەلىنگەن قازاقپارات ءتىلشىسىنىڭ رەسمي ساۋالىنا جولدانعان جاۋاپتا.

ۇلتتىق بانك دەرەگىنە سايكەس، 10 - ناۋرىزداعى جاعداي بويىنشا، «7-20-25» باعدارلاماسى ارقىلى 1,26 تريلليون تەڭگەگە 97 مىڭنان استام ءوتىنىم قابىلدانعان. ونىڭ ىشىندە 488,5 ميلليارد تەڭگەگە 39 مىڭنان استام قارىز بەرىلگەن. قازىر تاڭدا باعدارلاما 9 ەكىنشى دەڭگەيدەگى بانك ارقىلى ىسكە اسىرىلىپ وتىر.

ۇلتتىق بانك ماماندارى بۇگىندە «باسپانا حيت» يپوتەكالىق باعدارلاماسى اياقتالعانىن ەسكە سالدى. بۇل باعدارلاما بويىنشا 609,7 ميلليارد تەڭگەگە 64,6 مىڭ قارىز بەرىلگەن.

اۆتور: ەسىمجان ناقتىباي