جاقسىلىق ۇشكەمپىروۆتىڭ قۇرمەتىنە ارنالعان تۋرنير: قازاقستاندىقتار 6 «التىن» الدى
سپورتتى دامىتۋ ديرەكتسياسىنان ءمالىم ەتكەندەي، اتالعان سايىستا ەلىمىزدىڭ تۇپكىر-تۇپكىرىنەن كەلگەن بوز كىلەم شەبەرلەرىمەن قاتار قىرعىزستان، وزبەكستان، تاجىكستان، ازەربايجان مەن يزرايلدىڭ ۇزدىك 164 سپورتشىسى 3 كۇن بويى ءوزارا سىنعا ءتۇستى.
«بۇل جارىستىڭ ءبىز ءۇشىن ورنى ەرەكشە. ونىڭ اۋقىمى جىلدان-جىلعا كەڭەيىپ كەلە جاتقانى قۋانتادى. كەلەسى جىلى بۇدان دا كوپ ەل قاتىسۋى ءۇشىن ونىڭ مەرزىمىن جىلدىڭ باسىنا اۋىستىرۋ كەرەك بولادى. ونى حالىقارالىق كۇرەس فەدەراتسياسىنىڭ كۇنتىزبەسىن ەسكەرە وتىرىپ، بەكىتۋىمىز قاجەت. مىسالى، وسى جارىسقا وزبەكستان قۇراماسى ءبىراز مىقتى بالۋاندارىن جىبەرە المادى. سەبەبى، وندا قازىر ەل چەمپيوناتى ءوتىپ جاتىر. ال ازەربايجان مەن قىرعىزستان قۇراماسى نەگىزگى قۇراممەن كەلدى»، - دەدى قازاقستان گرەك-ريم، ەركىن جانە ايەلدەر كۇرەسى فەدەراتسياسىنىڭ پرەزيدەنتى داۋلەت تۇرلىحانوۆ.
بۇل تۋرنيردە قازاق بالۋاندارى اراسىنان ايبەك ايتبەكوۆ (55 كەلى)، ولجاس ەرعالي (77 كەلى)، يسلام ەۆلويەۆ (82 كەلى)، نۇراسىل امانالى (87 كەلى)، نۇرتاس قىدىربايەۆ (97 كەلى) جانە جوحار ۋزاروۆ (130 كەلى) ءوز سالماعىندا چەمپيون اتاندى. قازاقستاندىق سپورتشىلار جارىستى 6 التىن، 5 كۇمىس، 14 قولا مەدالمەن اياقتادى.
«جازدا ازيا چەمپيوناتىنا باراتىن ۇلتتىق قۇراما بالۋاندارى ءوز دەڭگەيىن تاعى ءبىر مارتە كورسەتتى. ەلىمىزدىڭ وڭىرلەرىنەن اقتوبە وبلىسى جاقسى ناتيجە كورسەتتى. الداعى 2 ايدا ءبىز ءۇشىن جاۋاپتى جارىستار بار. الداعى كۇندەرى ازەربايجان قۇراماسىمەن بىرلەسىپ، دايىندىقتىڭ ءبىرىنشى كەزەڭىنە كىرەسەمىز. ولاردىڭ كوزدەگەنى - ەۋروپا چەمپيوناتى»، - دەپ ءمالىم ەتتى قازاقستان جاستار قۇراماسىنىڭ اعا باپكەرى قونىسبەك تۇكەنوۆ.
وليمپيادا چەمپيونى جاقسىلىق ۇشكەمپىروۆتى ەسكە الۋعا ارنالعان باسەكە وسىمەن ءۇشىنشى رەت ۇيىمداستىرىلىپ وتىر. داڭقتى بالۋان قايتىس بولعانعا دەيىن بوز كىلەم شەبەرلەرىنىڭ تۋرنيرى جاقسىلىق ۇشكەمپىروۆتىڭ جۇلدەسى ءۇشىن ءوتىپ كەلگەن ەدى.
وسى سايىستان كەيىن ەلوردادا قازاقستان مەن ازەربايجان قۇرامالارى بىرلەسكەن وقۋ-جاتتىعۋ جيىنىن وتكىزىپ، قۇرلىق چەمپيوناتىنا دايىندىققا كىرىسەدى.
ايتا كەتەيىك، قازاقستاندىق بالۋاندار 12-20- شىلدە ارالىعىندا يوردانيا استاناسى امماندا وتەتىن سارى قۇرلىق باسەكەسىندە (U-15 پەن 20) باق سىناسادى. ال ازەربايجان سپورتشىلارى ەۋروپا چەمپيوناتىنىڭ جۇلدەسىنە تالاسادى. وسى جاس ساناتىنداعى الەم چەمپيوناتى 14-20- تامىز ارالىعىندا پولشا استاناسى ۆارشاۆادا وتپەك.