2022-جىلدان باستاپ ق ر ۇلتتىق ستاتيستيكالىق بيۋروسى ماماندارى ءوز-ءوزىن جۇمىسپەن قامتىعان قازاقستاندىقتار اراسىندا تابىسى جوعارى ادامداردى انىقتاۋ شكالاسىن كوتەرگەن. قازىر اۋقاتتى كاسىپكەرلەر مەن تاۋەلسىز جۇمىسشىلار ساناتىنا ەنۋ ءۇشىن 2021-جىلعىداي 500 مىڭ تەڭگە ەمەس، 1 ميلليون تەڭگە تابىس بولۋى كەرەك.
قازاقستاندا 8,9 ميلليون جۇمىسپەن قامتىلعان ادام بار. ونىڭ 6,8 ميلليونى - جالدامالى جۇمىسشىلار، 2,1 ميلليونى - ءوز-ءوزىن جۇمىسپەن قامتىعاندار. ۇلتتىق ستاتيستيكا بيۋروسىنىڭ ماماندارىنا كەيىنگى ساناتقا جەكە كاسىپكەرلەردى؛ ا ق، ءار ءتۇرلى جەكە سەرىكتەستىكتەر قۇرىلتايشىلارى، قاتىسۋشىلارىن؛ وندىرىستىك كووپەراتيۆ مۇشەلەرىن؛ جەكە جۇمىس ىستەيتىن ادامدار مەن جەكە شارۋاشىلىق ۇستاپ، ءونىمىن ساتاتىنداردى جاتقىزادى.
قازاقستانداعى ءوز-ءوزىن جۇمىسپەن قامتىعانداردىڭ تابىسى ءماز ەمەس. وسى ساناتتاعىلاردىڭ 24,8 پايىزى (528,9 مىڭ ادام) بىلتىرعى ءتورتىنشى توقساندا ايىنا 60 مىڭ تەڭگەدەن 100 مىڭ تەڭگەگە دەيىن تابىس تاپقان. تاعى 358,9 مىڭ ازامات ەڭ تومەنگى جالاقىدان تومەن تابىس تاپتى: 37,4 مىڭ تەڭگەدەن 60 مىڭ تەڭگەگە دەيىن. جارتى ميلليونعا جۋىق ءوزىن جۇمىسپەن قامتىعانداردىڭ تابىسى 100 مىڭ تەڭگەدەن 150 مىڭ تەڭگەگە دەيىن بولدى. وسىلايشا، ءوزىن جۇمىسپەن قامتىعانداردىڭ جالپى سانىندا مەديانالىق تابىستان (204 مىڭ تەڭگە) ايتارلىقتاي تومەن جالاقى الاتىن تاۋەلسىز جۇمىسشىلار باسىم بولدى: 81,4 پايىز نەمەسە 1,7 ميلليون ازامات.
تابىسى 500 مىڭ تەڭگەدەن اساتىن اۋقاتتى كاسىپكەرلەردىڭ ۇلەسى از بولىپ شىقتى: بار بولعانى 1 پايىز نەمەسە 22,3 مىڭ ادام. ونىڭ تەڭ جارتىسى جالاقىسى 500 مىڭ تەڭگەدەن 800 مىڭ تەڭگەگە دەيىن (10,3 مىڭ ادام). 2022 -جىلدىڭ قازان-جەلتوقسان ايلارىندا ءوزىن جۇمىسپەن قامتىعان 6 مىڭعا جۋىق قازاقستاندىق ايىنا 800 مىڭ تەڭگەدەن 1 ميلليون تەڭگەگە دەيىن السا، وسىنداي ادام ميلليونەر بولىپ ەسەپتەلدى. 2022-جىلعى ءبىرىنشى توقساندا تابىسى 1 ميلليون تەڭگەدەن كوپ، ءوزىن جۇمىسپەن قامتىعان ازاماتتار بىرنەشە ەسە ازايدى: بار بولعانى - 1,2 مىڭ ادام.
ميلليونەر كاسىپكەرلەرىڭ وڭىرلەر بويىنشا سانى بىركەلكى ەمەس. تابىسى 1 ميلليون تەڭگەدەن كوپ بارلىق تىركەلگەن ءوزىن-ءوزى جۇمىسپەن قامتۋشىنىڭ 89 پايىزى الماتىلىقتار (5,3 مىڭ ادام) بولدى. تاعى 9 پايىزى، ياعني 541 ادام استانا قالاسى مەن اقمولا وبلىسىندا تۇرادى. وتە از ۇلەس (شامامەن 2 پايىزى) ماڭعىستاۋ جانە ۇلىتاۋ وڭىرلەرىندە. باسقا وڭىرلەردە ميلليونداعان تابىسى بار ءوزىن جۇمىسپەن قامتىعاندار جوق.
ساناتتاعى بارلىق ازاماتتىڭ 95,1 پايىزى قالا تۇرعىندارى (5,7 مىڭ ادام) بولىپ شىقتى. تەك 293 ادام (4,9 پايىز) اۋىلدا كاسىپپەن اينالىسىپ، 1 ميلليون تەڭگە تابىسقا قول جەتكىزگەن.
ميلليونەرلەردىڭ جارتىسىنا جۋىعى ساۋدا سالاسىندا جۇمىس ىستەۋ ارقىلى وسىنداي جوعارى تابىسقا قولجەتكىزگەن (44,8 پايىز). تابىسى 1 ميلليون تەڭگەدەن كوپ ءوز-ءوزىن جۇمىسپەن قامتىعانداردىڭ 21 پايىزدان استامى جىلجىمايتىن مۇلىك سالاسىندا بيزنەس يەلەرى نەمەسە تاۋەلسىز ساراپشىلار بولدى. قۇرىلىس سالاسى ءۇشىنشى ورىندا (13,3 پايىز). ميلليونداعان تابىسى بار ءوزىن ءوزى جۇمىسپەن قامتىعاندار ەڭ از سالا - اۋىل، ورمان جانە بالىق شارۋاشىلىعى (1,2 پايىز).
شۆەيتساريالىق Credit Suisse (CS) بانكىنىڭ الەمنىڭ ءارتۇرلى ەلدەرىندەگى ءال-اۋقات دەڭگەيى تۋرالى Global Wealth Report 2022 اناليتيكالىق ەسەبىنىڭ دەرەكتەرىنە سۇيەنسەك، 2021-جىلدىڭ سوڭىنا قاراي قازاقستانداعى دوللارلىق ميلليونەرلەردىڭ ۇلەسى رەسپۋبليكانىڭ ەرەسەك تۇرعىندارىنىڭ 0,3 پايىزى بولادى. بۇل - 36,9 مىڭ ادام. 2020-جىلمەن سالىستىرعاندا مۇنداي دەڭگەيدەگى قازاقستاندىقتاردىڭ سانى 50,9 پايىز ءوستى. پاندەميانىڭ ءبىرىنشى جىلىندا بايلىعىن ميلليونداعان ا ق ش دوللارىمەن ولشەيتىندەر، دەرەككوزگە سۇيەنسەك، ەلدە 24,5 مىڭ ادام بولعان.