سمارتفوننان بولاتىن 6 جاعىمسىز اسەر
كىتاپ وقۋعا نەمەسە سپورتپەن اينالىسۋعا ۋاقىت جەتپەيدى دەپ جاتامىز. الايدا ۇيالى تەلەفون مەن باسقا گادجەتتەرگە قانشا ۋاقىت جۇمسايتىنىمىزدى بايقامايمىز. كۇندە سمارتفونعا ۇزاق قاراپ وتىرۋ ءبىزدىڭ ەموتسيالىق تا، فيزيكالىق تا جاعدايىمىزعا اسەر ەتەدى.
ارقا اۋىرادى
ەگەر سمارتفونعا ۇزاق قاراپ وتىرۋعا نەمەسە ىڭعايسىز كۇيدە ويىن ويناپ وتىرۋعا ۇيرەنىپ قالعان بولساڭىز، اراسىندا ارقاڭىز جانە بەلىڭىز اۋىراتىنىن بايقاعان بولارسىز. سەبەبى كەۋدە جانە مويىن بولىكتەرى قينالادى. مىسالى، ۇيالى تەلەفوننان بىردەڭە وقىردا باسىڭىزدى تومەن سالبىراتاسىز، مويىن بۇلشىقەتتەرىنە سالماق تۇسىرەسىز، ال ول جۇيكەلەردىڭ قىسىلۋىنا اكەلۋى مۇمكىن. مۇنداي اۋىرسىنۋلار اسقىنىپ كەتپەس ءۇشىن جانە ومىرتقا قيسايۋىن بولدىرماس ءۇشىن ءارقاشان باستى تىكە ۇستاۋعا تىرىسىڭىز. سونداي- اق، ءجۇرىپ وقۋدان باس تارتىڭىز جانە تەلەفوندى بەتتەن 40 سانتيمەتر الشاقتىقتا ۇستاڭىز. ارينە، ەڭ باستىسى — جاتتىعۋلار جاساۋدى ۇمىتپاۋ.
كورۋ ناشارلايدى
ەگەر جۇمىس كۇنىن تەك مونيتور الدىندا وتكىزسەڭىز، ال ودان كەيىن ۇيگە كەلە جاتقاندا جانە تاماق ءىشىپ وتقاندا ەكرانعا قاراپ وتساڭىز، قۇرعاق كوز سيندرومىنا جولىققان بولۋىڭىز ابدەن مۇمكىن. وعان قوسا، سمارتفونداعى ۇساق ءماتىندى وقۋ كەزىندە كوزدى قاتتى كۇيزەلىسكە شالدىقتىراسىز. گادجەتتەرمەن اۋەستەنۋ كوزدىڭ تەز شارشاۋىن شاقىرادى. بۇل ادەتىڭىزدى وزگەرتپەسەڭىز، ۋاقىت وتە ناشار كورە باستاۋىڭىز مۇمكىن. مۇنداي جاعداي ورىن الماس ءۇشىن كوزدى ءار 20-30 مينۋت سايىن دەمالتۋدى ۇمىتپاڭىز جانە ەكرانعا سيرەك قاراۋعا تىرىسىڭىز.
تەرى پروبلەمالارى پايدا بولادى
سمارتفون — ءتۇرلى باكتەريالاردىڭ ۇياسى. ونىڭ كۇنى بويى لاس زاتتارمەن جاناساتىنىن ۇمىتپاڭىز. ال ءسىز ونى سويلەسۋ ءۇشىن نەمەسە داۋىستىق حابارلاما تىڭداۋ ءۇشىن بەتىڭىزگە قايتا- قايتا تاقايسىز. سمارتفون بەتىندە بولاتىن باكتەريالار بورتپە مەن دەرماتيت پايدا بولۋىنا جانە تەرى تىتىركەنۋىنە يتەرمەلەۋى مۇمكىن. مۇنداي پروبلەمالاردىڭ پايدا بولۋ قاۋپىن ازايتۋ ءۇشىن گادجەتتەر تازالىعىن ساقتاڭىز. مىسالى، ولاردى انتيباكتەريالىق مايلىقتارمەن ءسۇرتىڭىز جانە كەز كەلگەن جەرگە قويا بەرۋدى قويىڭىز.
مازاسىزدانۋعا جاڭا سەبەپتەر پايدا بولادى
قازىر قىلمىستار، ەكولوگيالىق جانە ەكونوميكالىق پروبلەمالار، ءتۇرلى اپاتتار جايلى اقپارات كوپ. مۇنداي جازبالاردىڭ جاعىمسىز ەموتسيالاردى شاقىرماۋى جانە مازاسىزدانۋعا اكەلمەۋى مۇمكىن ەمەس. ۇنەمى الەۋمەتتىك جەلىلەردە وتىرۋ — زاماناۋي ادامدا دەپرەسسيانىڭ پايدا بولۋىنا سەبەپشى فاكتوردىڭ ءبىرى. ەگەر جاڭالىقتار وقىعاننان كەيىن ءوزىڭىزدى مازاسىز سەزىنەتىنىڭىزدى بايقاساڭىز، الەۋمەتتىك جەلىلەردە وتكىزەتىن ۋاقىتتى ازايتۋعا تىرىسىڭىز.
«ۋىستان شىعارىلعان پايدا» سيندرومى داميدى
«ۋىستان شىعارىلعان پايدا» سيندرومى — ۇنەمى قىزىقتى نارسەنى (جاڭالىقتى) نەمەسە قانداي دا ءبىر مۇمكىندىكتى جىبەرىپ الۋدان قورقۋ. الەۋمەتتىك جەلىلەردەگى ادامداردىڭ قارىم- قاتىناسىن كورە الماۋ دا بۇل سيندرومنىڭ پايدا بولعانىن بىلدىرەدى. باسقا ادامداردىڭ باقىتتى ءومىرىن باقىلاي وتىرىپ، ءبىز ءوزىمىزدى كۇيزەلىسكە تۇسىرتەمىز جانە ءوز ءومىرىمىزدى ءىش پىستىرارلىق سانايمىز. مۇنداي ويلار ءوز- ءوزىڭىزدى باعالاۋىڭىزدى ءتۇسىرىپ جىبەرۋى مۇمكىن.
باسقالارمەن سويلەسۋ داعدىسى ناشارلايدى
ءاربىر ادامنىڭ مىناداي ءبىر تانىسى بار: ءسىز ونىمەن سويلەسىپ وتساڭىز دا، ول الەۋمەتتىك جەلىدەگى لەنتاسىن جاڭارتىپ وتىرادى. بۇل ارەكەتتى پسيحولوگيادا فاببينگ دەپ اتايدى جانە ول اڭگىمەلەسۋشىنى ەلەمەۋدىڭ ءبىر ادىسىنە جاتادى. ال باسقا ادامدار وزدەرىن سەنىمسىز سەزىنسە، تەلەفوندى پايدالانا باستايدى: ولار ءۇشىن سمارتفون قۇتقارۋشى زاتقا اينالعان. الەۋمەتتىك جەلىلەردە ءجيى وتىرۋ جانە تۇيىق ءومىر سالتى ۋاقىت وتە ادامنىڭ باسقالارمەن ارالاسۋ داعدىسىنىڭ ناشارلاۋىنا اكەلەدى. سوندىقتان دوستارىڭىزبەن ءجيى كەزدەسىڭىز جانە الەۋمەتتىك جەلىلەردى ۇمىتۋعا كومەكتەسەتىن جاڭا حوببي تابۋعا تىرىسىڭىز.