قالالىق اكىمدىكتىڭ قولداۋىمەن جانە «اكەلەر وداعى» رەسپۋبليكالىق قوعامدىق بىرلەستىگى ۇيىمداستىرعان فورۋمعا ەلىمىزدىڭ بارلىق وڭىرىنەن دەلەگاتتار قاتىسۋدا.
اتاپ ايتقاندا، وتباسىلىق ساياساتقا جاۋاپتى ورتالىق جانە وڭىرلىك مەملەكەتتىك ورگانداردىڭ، قوعامدىق بىرلەستىكتەردىڭ، حالىقارالىق ۇيىمداردىڭ، قازاقستان مۇسىلماندارى ءدىني باسقارماسى مەن قازاقستان حالقى اسسامبلەياسىنىڭ جانە عىلىمي-ساراپشىلىق قاۋىمداستىقتىڭ وكىلدەرى اكەلەر ينستيتۋتىن دامىتۋ ماسەلەسىن بىرلەسىپ تالقىلاۋدا.
سونىمەن قاتار القالى جيىندا ق ر پارلامەنتى سەناتىنىڭ دەپۋتاتى، ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى ءلاززات سۇلەيمەن، ق ر پارلامەنتى ءماجىلىسىنىڭ دەپۋتاتى باقىتبەك سماعۇل، ق ر اقپارات جانە قوعامدىق دامۋ ۆيتسە-ءمينيسترى اسقار ۋماروۆ، ب ۇ ۇ حالىقتىڭ قونىستانۋى سالاسىنداعى قورىنىڭ (ي ن ف پ ا) قازاقستانداعى اتقارۋشى وكىلى رايىمبەك سەيسەماليەۆ ءسوز سويلەپ، ءوز پىكىرلەرىن ورتاعا سالدى. وتباسى ينستيتۋتىن نىعايتۋ جانە ەر ادامداردىڭ وتباسىنداعى ءرولى مەن جاۋاپكەرشىلىگىن ارتتىرۋ ماقساتىندا ۇيىمداستىرىلعان فورۋم بارىسىندا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان دا جيىننىڭ ماڭىزىن اتاپ ءوتتى.
«بۇگىندە قوعام اۋقىمدى ترانسفورماتسيانى باسىنان وتكىزۋدە. وسىلاي جەدەل وزگەرىپ جاتقان قوعامداعى ەر ازاماتتاردىڭ ورنى مەن ءرولى، ونىڭ موينىنداعى مىندەتتەر قانداي؟ 21-عاسىر جاعدايىندا جاقسى اكەگە قانداي تالاپتار قويىلادى؟ بۇگىنگى فورۋم، مىنە، وسى ماسەلەلەردى اشىق تالقىلاۋىمەن ماڭىزدى دەپ ويلايمىن. سونىمەن بۇگىنگى اكەلەردىڭ ەڭ ماڭىزدى ميسسياسى قانداي؟ مەنىڭ ويىمشا قازىرگى اكەنىڭ باستى مىندەتى - ايەلدەرى باقىتتى ەتۋ. سەبەبى، ايەل باقىتتى بولسا، بالا دا، وتباسى دا باقىتتى بولادى. ءتىپتى، ايەل باقىتتى بولسا، الەم باقىتتى دەسەك تە ارتىق ايتقاندىق ەمەس، - دەدى شىڭعىس مۇقان. قالا اكىمىنىڭ ءبىرىنشى ورىنباسارى سونداي-اق، گەرري چەپمەننىڭ «ماحابباتتىڭ 5 ءتىلى» اتتى كىتابى اعىلشىن تىلىنەن قازاق تىلىنە اۋدارىلىپ جاتقانىن ايتتى. «بۇل كىتاپتا اۆتور وتباسى باقىتتى بولۋى ءۇشىن مىناداي 5 ءتاسىلدى قولدانۋدى ۇسىنادى. ولار: جاقسى ءسوز ايتۋ، ۋاقىتتى مازمۇندى وتكىزۋ، سىيلىق بەرۋ، ءبىر-بىرىنە ادال قىزمەت ەتۋ جانە فيزيكالىق قارىم-قاتىناس. بۇگىنگى ەر ازاماتتار وسى بەس ماسەلەگە مۇقيات بولسا، جارى مەن بالالارىن باقىتتى ەتە الادى دەپ ويلايمىن. بۇل ءوز كەزەگىندە ەلىمىزدە وتباسى ينستيتۋتىنىڭ نىعايۋىنا ىقپال ەتەدى»، - دەدى ش. مۇقان.