ەستە قالار وقيعالار
1992-جىلى قازاقستان رەسپۋبليكاسى مەن دانيا كورولدىگى اراسىندا ديپلوماتيالىق قارىم-قاتىناس ورناتۋ تۋرالى حاتتاماعا قول قويىلدى.
1993-جىلى الماتىدا رەسپۋبليكالىق كينو ۇيىندە 1991-1993-جىلدارى تۇسىرىلگەن فيلمدەردىڭ بايقاۋى ءوتتى. بايقاۋدىڭ قورىتىندىسىندا گران-پري جۇلدەسى «وتىراردىڭ كۇيرەۋى» (رەجيسسەرى ا. ءامىرقۇلوۆ) جانە «سۇرجەكەي» (رەجيسسەرى د. مانابايەۆ) فيلمدەرىنە بەرىلدى.
1998-جىلى قازاقستان رەسپۋبليكاسىنىڭ استاناسى - اقمولا قالاسىنىڭ اتاۋى استانا قالاسى بولىپ وزگەرىپ، «سارىارقا» جانە «الماتى» اۋداندارى قۇرىلدى.
2003-جىلى استانادا «حالىقتار دوستىعى» ەسكەرتكىشى اشىلدى. اۆتورى - ساكەن نارىنوۆ. 2010-جىلى قازاقستان رەسپۋبليكاسى سىرتقى ىستەر مينيسترلىگىنىڭ عيماراتىندا ەكىنشى دۇنيەجۇزىلىك سوعىس جىلدارىندا گەرمانيا جانە اۆستريا اۋماعىندا قازا تاپقان قازاقستاندىقتارعا ارنالعان ەستەلىك كىتابىنىڭ تۇساۋكەسەرى ءوتتى.
2010-جىلى الماتى قالاسىنداعى دوستىق داڭعىلىندا ورنالاسقان ۇيدە سوۆەت وفيتسەرى، ەكىنشى دۇنيەجۇزىلىك سوعىس ارداگەرى، «حالىق قاھارمانى»، رەيحستاگقا تۋ تىككەن راقىمجان قوشقاربايەۆقا ارنالعان مەموريالدىق تاقتا سالتاناتتى تۇردە اشىلدى.
2013-جىلى باكۋدە ازەربايجان مەملەكەتتىك اكادەميالىق وپەرا جانە بالەت تەاترى قازاقستاننىڭ جەتەكشى كومپوزيتورلارىنىڭ ءبىرى ەركەعالي راحمادييەۆتىڭ «الپامىس» وپەراسىنىڭ قويىلىمىن ۇسىندى.
2015-جىلى جەڭىستىڭ 70 جىلدىعىنا ارنالعان ءۇش ماركادان قۇرالعان پوشتالىق بلوك پايدالانۋعا ەنگىزىلدى. «ەستەلىك جانە مەرەيتويلىق داتالار» توپتاماسىنداعى ءاربىر ماركانىڭ نومينالى 200 تەڭگەنى قۇرايدى. پوشتا ماركالارىندا راقىمجان قوشقاربايەۆ (حالىق قاھارمانى)، مانشۇك مامەتوۆا (كەڭەس وداعىنىڭ باتىرى)، يۆان پانفيلوۆ (كەڭەس وداعىنىڭ باتىرى) بەينەلەنگەن.
2015-جىلى تۇركيانىڭ مانيسا پروۆينتسياسىندا «مەسير» حالىقارالىق فەستيۆالىندە تۇركيا رەسپۋبليكاسىنداعى قازاقستان رەسپۋبليكاسىنىڭ ەلشىلىگى مەن مانيسا پروۆينتسياسىنىڭ مۋنيتسيپاليتەتى ۇيىمداستىرعان قازاقستان كۇندەرى ءوتتى.
2017-جىلى «استانا» حالىقارالىق قارجى ورتالىعى (ا ح ق و) جانىنان قۇقىقتىق كونسۋلتاتسيالىق كەڭەس قۇرىلدى. كەڭەس مىندەتىنە قارجى ورتالىعىنىڭ جوبالارىنداعى اكتىلەردى قاراۋ جانە ساراپتاۋ، سونداي-اق، وزگە دە كەڭەس بەرۋ قىزمەتتەرى جاتادى. سونىمەن قاتار، كەڭەس قۇزىرەتىنە انگليا مەن ءۋەلستىڭ قۇقىقتىق قاعيدالارىن نەگىزگە الا وتىرىپ، قۇقىقتىق بازانى قالىپتاستىرۋ جانە دە الەمدەگى جەتەكشى قارجى ورتالىقتارىنىڭ ستاندارتتارىمەن جۇمىس ىستەۋ دە كىرەدى.
2019-جىلى سانكت-پەتەربۋرگتە كەڭەس وداعىنىڭ باتىرى، قازاق حالقىنىڭ داڭقتى قىزى ءاليا مولداعۇلوۆاعا ەسكەرتكىش ورناتىلدى. ەسكەرتكىش سانكت-پەتەربۋرگتا قىزىل گۆارديا اۋدانىندا قىزىل گۆارديا كوشەسىندەگى قالا ساياباقتارىنىڭ بىرىندە ورنالاسقان. بيىكتىگى 3 مەترلىك قولادان جاسالعان ءمۇسىن قىزعىلت گرانيتتى تۇعىرعا ورناتىلعان.
وعان باتىر قىزدىڭ ەسىمى مەن جۇلدىزى ويىلىپ سالىنعان. تۇعىردىڭ ارعى بەتىندە ونىڭ قاھارماندىعى تۋرالى قىسقاشا مالىمەت بەرىلگەن.
2019-جىلى لەنينگراد وبلىسىنىڭ كينگيسەپپ قالاسىندا كەزىندە لەنينگرادتىڭ قورشاۋىن بۇزىپ بەرگەن قازاقستاندىق جاۋىنگەرلەر رۋحىنا ورناتىلعان گرانيت ەسكەرتكىش سالتاناتتى تۇردە اشىلدى. وسى ماڭداعى ۇرىستارداعى ەرەكشە ەرلىگى ءۇشىن 314-اتقىشتار ديۆيزياسىنا كەزىندە «كينگيسەپتىك» دەگەن ات دا قويىلعان. ەسكەرتكىش تۇبىنە جاساق مۇشەلەرى تۋعان جەردىڭ ءبىر ۋىس توپىراعى سالىنعان كاپسۋلانى دا قوسا كومدى. ول كەزىندە وسى ديۆيزيا ساپىنا اسكەرلەر اتتانعان پاۆلودارداعى بۇرىنعى تەمىرجول ۆوكزالى ماڭىنان الىنعان.