شەتەلدىك وتباسى 6 رەت ساتسىزدىكتەن كەيىن قازاقستاندا ە ك ۇ ارقىلى بالالى بولدى

الماتى. قازاقپارات - الماتى رەپرودۋكتولوگيالىق ەمحاناسىندا شەتەلدىك جۇپ ە ك ۇ ارقىلى ءسابيلى بولدى، دەپ حابارلايدى قازاقپارات ءتىلشىسى.

قازاقستاندىق دارىگەرلەردىڭ كومەگىمەن ە ك ۇ دۇنيەگە كەلگەن بالالار الەمنىڭ 50 ەلىندە ءومىر ءسۇرىپ جاتىر. ويتكەنى، مەديتسينالىق تۋريزمنىڭ دامۋىنا ەلدەگى ارزان قىزمەتتەر سەرپىن بولىپ وتىر.

قازاقستان رەپرودۋكتيۆتى مەديتسينا قاۋىمداستىعىنىڭ ءتوراعاسى ۆياچەسلاۆ لوكشين قازاقستاندا بولعان ەرەكشە وقيعا تۋرالى ايتىپ بەردى.

ونىڭ ايتۋىنشا، بىلتىر شەتەلدىك وتباسى قازاقستاندىق رەپرودۋكتولوگتاردىڭ كومەگىمەن پەرزەنت سۇيگەن.

اۋستراليالىق ءوزىنىڭ وڭتۇستىك كورەيالىق جارىمەن تۋعان جەرىندە بىرنەشە رەت ە ك ۇ ارقىلى ءسابيلى بولۋعا تىرىسقان. الايدا بۇل ەم- شارا ءساتسىز بولدى.

«ءبىزدىڭ دارىگەرلەر اعىلشىن تىلىندە جاقسى سويلەيدى. سوندىقتان الەمدەگى بارلىق رەپرودۋكتولوگيا سالاسىنداعى جاڭالىقتار ءبىزدىڭ ەلدە بەلسەندى قولدانىلىپ وتىر. ونىڭ ىشىندە ەمبريوندى 46 حروموسوماعا تەكسەرۋ دە مۇمكىن بولىپ وتىر. قازاقستان مەديتسينالىق تۋريزم ورتالىعىنا اينالدى. ادامدار بىزگە تەك مەديتسينالىق قىزمەتتىڭ ارزاندىعى ءۇشىن عانا ەمەس، دارىگەرلەردىڭ بىلىكتىلىگى ءۇشىن دە كەلەدى»، - دەدى ۆياچەسلاۆ لوكشين.

ماسەلەن مىنا جۇپ 5 جىل بۇرىن وتاسقان. العاشقى 3 جىلدا دارىگەرلەرگە قارالماعان.

ودان كەيىن وڭتۇستىك كورەيا ماماندارىنا قارالا باستاعان. قازاقستاندىق رەپرودۋكتولوگتىڭ ايتۋىنشا، ولاردىڭ ءسابي ءسۇيۋ مۇمكىندىگى وتە تومەن بولعان.

ەكەۋى دە 40-تان اسقان انالىق اتالىق جۇمىرتقالاردىڭ سانى شەكتەۋلى، ۇرىقتىڭ ساپاسى دا جوعارى بولماعان.

وڭتۇستىك كورەياداعى رەپرودۋكتولوگتار تەك 3 انالىق جاسۋشا العان. ال قازاقستان ماماندارى 5 انالىق جاسۋشا الدى. وسىدان- اق، بۇل جۇپ قازاقستاندىق مەديتسيناعا قارالۋعا تۇپكىلىكتى بەكىنگەن.

«الايدا ءبىرىنشى باعدارلاما ءساتسىز اياقتالدى. ايەلدىڭ جاسى 41-گە كەتىپ بارا جاتقان سوڭ، ءبىز دونوردىڭ انالىق جاسۋشاسىن الۋدى ۇسىندىق. ءبىراق، وتباسى بۇعان كەلىسپەدى. كەيىن ولار ساقتاندىرۋ پوليسى ارقىلى اۋسترالياعا بارىپ جاساپ كوردى. الايدا ول جاقتا دارىگەرلەر 1 اق انالىق جۇمىرتقا الا الدى. ول دا ءساتسىز بولدى. 4 ايدان سوڭ پاتسيەنتتەر قايتا ورالدى. قايتادان باعدارلامانى باستاعان سوڭ انالىق ۇرىقتى قۇرساققا قوندىرۋعا كىرىستىك. كوپتەن كۇتكەن جۇكتىلىك پايدا بولدى. الايدا ايەل باستان اياق بوسانعانشا اكۋشەردىڭ باقىلاۋىندا بولدى. 8,5 ايدان سوڭ وتباسىندا دەنى ساۋ قىز بالا دۇنيەگە كەلدى. باقىتتى وتباسى شەتەلگە كەتتى. بىزبەن بايلانىستى ۇزگەن جوق، بالاسىنىڭ جاعدايى تۋرالى ۇنەمى حابارلاپ تۇرادى»، - دەدى ۆ. لوكشين.

اۆتور: گۇلميرا عوسمانالي