ۇلىتاۋدا وتكەن «كوكمايسا» ەتنوفەستيۆالىنە 6 مىڭنان استام حالىق جينالدى
ۇلىتاۋ اۋدانىندا 14-16- ماۋسىم ارالىعىندا «كوكمايسا» ەتنوفەستيۆالى ءوتتى. بيىل ۇيىمداستىرۋشىلار قوناقتار مەن قاتىسۋشىلار ءۇشىن ەرەكشە باعدارلاما دايىنداعان. «ءبىز وسى جىلى ساداق اتۋ، كوكپار جانە قىز قۋۋ سياقتى ۇلتتىق ويىنداردى قوستىق. رەسپۋبليكالىق عىلىمي- تاجىريبەلىك كونفەرەنتسيا دا - بيىلعى شارانىڭ جاڭالىعى بولدى. سونىمەن قاتار، جاستار جىلى بولعاندىقتان، ءبىز «التىباقان اۋەندەرى» مەرەكەسىن ۇيىمداستىردىق. فەستيۆالگە بارلىعى 6000-نان استام ادام قاتىستى» ، - دەدى ۇلىتاۋ اۋدانى اكىمىنىڭ ورىنباسارى باعدات بايجانتايەۆ.
«كوكمايسا» ەتنوفەستيۆالىنە قوناقتار بۇكىل قازاقستاننان جينالدى. شارانىڭ اشىلۋ سالتاناتىندا جينالعان قاۋىم نازارىنا تەاترلاندىرىلعان قويىلىم ۇسىنىلدى. «ەدىگە تاۋ - ەسكى جۇرت ەسكەرتكىشى» اتتى عىلىمي- تاجىريبەلىك كونفەرەنتسيادا ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى، تاريح عىلىمدارىنىڭ دوكتورى جامبىل ارتىقبايەۆ ءسوز سويلەدى. سونىمەن قاتار، كونفەرەنتسياعا ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى، تاريح عىلىمىنىڭ دوكتورى تىلەگەن سادىقوۆ، س. سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ قازاقستان تاريحى كافەدراسىنىڭ مەڭگەرۋشىسى، تاريح عىلىمدارىنىڭ كانديداتى ءومىرباي بەكماعانبەتوۆ، جازۋشى، قازاقستان جازۋشىلار وداعىنىڭ مۇشەسى، ەدىگە باتىردى زەرتتەۋشى كامەل جۇنىستەگى جانە قازاقستان جۋرناليستەر وداعىنىڭ مۇشەسى تورەحان مايباس قاتىستى.
فەستيۆال باعدارلاماسىندا قولدانبالى ونەر بويىنشا بايقاۋلار مەن شەبەرلىك ساباعى بولدى. قوناقتار ءداستۇرلى تۇردە دايىندالعان قىمىز مەن قازاق ءاسۇيىنىڭ تاعامدارىنان ءدام تاتىپ كوردى. سونداي- اق ساداق اتۋ، قاتىن كۇرەس، اۋدارىسپاق، تەڭگە الۋ، اساۋ ۇيرەتۋ، مەشكەيلەر جارىسى، قىمىز ىشۋدەن جارىس، كوكپار، الامان بايگە جانە قىز قۋۋ ۇلتتىق جارىستارى ۇيىمداستىرىلدى.
فەستيۆالدىڭ ەكىنشى كۇنى ءداستۇرلى جانە بارد اندەرىنىڭ بايقاۋى ءوتتى. ءداستۇرلى انشىلەر بايقاۋىندا ارداق مۇقىشيەۆ جەڭىمپاز اتاندى. بارد اندەرى بايقاۋىندا ەركىن جاباعانوۆ جەڭىسكە جەتتى. فەستيۆال سوڭىندا قوناقتار مەن قاتىسۋشىلار ۇلىتاۋ تاۋلارىنا ەكسكۋرسياعا اتتاندى. ۇيىمداستىرۋشىلاردىڭ ايتۋىنشا، «كوكمايسا» ەتنوگرافيالىق فەستيۆالى الداعى ۋاقىتتا دا جىل سايىن وتكىزىلەدى. ول قازاقستاننىڭ ۇلتتىق مادەنيەتىن كەڭىنەن ناسيحاتتاپ، كوپتەگەن تۋريستەردى تارتادى.