چەمپيوندار ليگاسى: «بارسەلونا» 6 گول سالىپ شيرەك فينالعا شىقتى - كەسكىن

استانا. قازاقپارات - ساناۋلى ساتتەر بۇرىن چەمپيوندار ليگاسىنىڭ شيرەك فينالىنا شىققان تاعى ەكى كوماندا انىقتالدى، دەپ حابارلايدى قازاقپارات.

يسپاندىق «بارسەلونا» 1/8 فينالى اياسىنداعى قارىمتا كەزدەسۋدە فرانسيالىق پ س ج- نى 6:1 ەسەبىمەن تىزە بۇكتىردى. ۇزىلىسكە دەيىن كاتالوندىقتار 2 گول سالىپ ۇلگەردى. 3- مينۋتتا سۋارەس ەسەپ اشقان. ال 40-مينۋتتا ينەستا باعىتتاعان دوپتى ءوز قاقپاسىنا پ س ج ويىنشىسى لەۆەن كۋرزاۆا سالىپ الدى.

ەكىنشى تايمدا «بارسەلونا» تاعى 4 گول سالدى. 50- مينۋتتا ليونەل مەسسي پەنالتيدى گولعا ۇلاستىرا ءبىلدى. وعان پ س ج فورۆارد ەدينسون كاۆانيدىڭ گولىمەن جاۋاپ قايتارا العان. الايدا بۇل فرانتسۋزداردىڭ قارىمتا كەزدەسۋدە سالعان جالعىز گولى بولىپ قالدى. ويىننىڭ سوڭىندا نەيمار جانكۇيەرلەرىن قۋانتتى. 88-مينۋتتا گول سالىپ، 90-مينۋتتا پەنالتيدى ءساتتى ورىندادى. ال جەڭىس گولىن سەردجي روبەرتو سالدى.

ەسكە سالا كەتەيىك، العاشقى ويىندا «بارسەلونا» پ س ج- دان وڭباي جەڭىلگەن (4:0) ەدى. ءبىراق ەكى ويىننىڭ قورىتىندىسى بويىنشا جالپى ەسەپ 6:5 - "بارسەلونا" كەلەسى كەزەڭگە ءوتتى. پارالەل وتكەن ويىندا نەمىستىڭ "بورۋسسياسى" ءوز الاڭىندا پورتۋگاليالىق "بەنفيكانى" 4:0 ەسەبىمەن جەڭدى. بۇل ەكى كوماندانىڭ العاشقى ويىنىندا «بەنفيكا» 1:0 ەسەبىمەن جەڭگەن بولاتىن. بۇل جۇپتان كەلەسى كەزەڭگە جالپى 4:1 ەسەبىمەن «بورۋسسيا» ءوتىپ وتىر. ايتا كەتەيىك، كەشە يسپاندىق «رەال مادريد» يتاليالىق «ناپوليدى» (3:1 جانە 3:1)، نەمىستىڭ «باۆارياسى» اعىلشىننىڭ «ارسەنالىن» (5:1 جانە 5:1) جەڭىپ، شيرەك فينالعا شىققان ەدى. چ ل 1/8 فينالى اياسىندا كەلەسى ويىندار ناۋرىزدىڭ 14 ىنەن 15 ىنە قاراعان ءتۇنى وتەدى. يتاليالىق "يۋۆەنتۋس" ءوز الاڭىندا "پورتۋدى" قابىلدايدى. ال اعىلشىننىڭ «لەستەر» كومانداسى يسپاندىق "سيەۆيليا" كومانداسىمەن كەزدەسەدى. قوس ويىن دا استانا ۋاقىتىمەن 1:45 تە باستالادى.

 

اۆتور: ەربول جانات