الماتىداعى ءىرى ورتتەن قازا تاپقاندار سانى 6 ادامعا جەتتى
كەشە وقيعا ورنىنان ءبىر ەر ادامنىڭ ءولى دەنەسى تابىلعان بولاتىن.
«2016 -جىلدىڭ 7 - قاراشا كۇنى تاڭەرتەڭ ءورت ورنىندا قالىپ قويعان جەكەلەگەن تۇتانۋى مۇمكىن وشاقتاردى ءسوندىرۋ جانە ۇيىندىلەردى تازارتۋ ءۇشىن جۇرگەن جەتەكشىگە عيمارات اكىمشىلىگىنەن 5 ادامنىڭ جوعالىپ كەتكەنى جايلى حابارلاندى. ءورت سوندىرۋشىلەر جوعالعان بەس ادامنىڭ مۇردەسىن 6-قاباتتان تاپتى. ولار مونتاجداۋ جۇمىستارىن جۇرگىزىپ جاتقان جۇمىسشىلار بولۋى مۇمكىن. مايىتتەردىڭ جىنىسى مەن جەكە اقپاراتتارى انىقتالۋدا»، - دەلىنگەن الماتى ق. ت ج د باسپا ءسوز قىزمەتىنىڭ حابارلاماسىندا.
ەسكە سالا كەتسەك، كەشە شامامەن كەشكى جەتىدە الماتى ق. ءى ءى د جەدەل باسقارما ورتالىعىنا بيزنەس- ورتالىقتاعى ءورت تۋرالى حابار كەلىپ ءتۇستى. عيماراتتان 80 ادام كوشىرىلدى. 54 جاستاعى دانەكەرلەۋشىنىڭ ءمايىتى تابىلدى. قوعامدىق ءتارتىپتى ساقتاۋعا جانە كولىك قۇرالدارىن رەتتەۋگە الماتى قالالىق ءى ءى د- ءنىڭ 65 قىزمەتكەرى اتسالىستى.