بۇگىن الماتىدا 6- قىسقى رەسپۋبليكالىق ۋنيۆەرسيادا باستالدى
ءار ەكى جىل سايىن وتكىزىلەتىن بۇل شارانىڭ ماڭىزى زور. سوندىقتان دا جارىستى ۇيىمداستىرۋشىلار مەن قاتىسۋشىلارعا ارتىلاتىن جاۋاپكەرشىلىك تە جوعارى. الماتىداعى «سۇڭقار» سپورت كەشەنىندە VI رەسپۋبليكالىق قىسقى ۋنيۆەرسياداعا دايىندىق جۇمىستارى قىزۋ جۇرگىزىلۋدە.
500 دەن اسا ستۋدەنت جۇمىلدىرىلعان ەكەن. قازىر سالدەن سوڭ دايىندىق جۇمىستارىنا وسى جارىستىڭ، ياعني ۋنيۆەرسيادانىڭ سيمۆولى - اق بارىس تا ارالاسادى. ەل تاۋەلسىزدىگىنىڭ 25 جىلدىعىمەن قاتار كەلگەن رەسپۋبليكالىق ۋنيۆەرسيادانىڭ جوعارى دەڭگەيدە ءوتۋى ءۇشىن ۇيىمداستىرۋشىلار بار كۇش جىگەرلەرىن سالۋدا. ويتكەنى قىر استىندا بۇكىل الەمدىك XXVIII ۋنيۆەرسيادا تۇر. سوندىقتان جارىستىڭ اشىلۋى مەن جابىلۋ سالتاناتىنا دەيىنگى ءىس-شارالار نازاردان تىس قالماعان.
«ءبىزدىڭ بۇل جەردەگى ەڭ باستى ءنومىرىمىز دەۋگە بولادى. سوڭىنا تامان وسىندا ءوزىمىزدىڭ جۇرگىزۋشى ترامپليننەن شاڭعىمەن سەكىرەدى. ونەرىن كورسەتەدى. بۇل جەردە ءبىزدىڭ ۆوكاليستەرىمىز بەن حورەگرافتارىمىز دا بار»، - دەيدى ۇيىمداستىرۋ القاسىنىڭ مۇشەسى ءانۋار قادىروۆ.
سوڭعى جىلدارى بۇكىل الەمدىك ۋنيۆەرسيادا ويىندارىندا قازاق ستۋدەنتتەرى تاماشا تابىستارعا قول جەتكىزدى.2015- جىلى سلوۆاكيا مەن يسپانيادا وتكەن قىسقى ويىنداردا ءبىزدىڭ قۇرامانىڭ 5 التىن 6 كۇمىس مەدالمەن كوماندالىق سىندا ۇزدىك ۇشتىكتەن كورىنۋى وسى سوزىمىزگە دالەل. قازاقستان ءبىلىم جانە عىلىم مينيسترلىگى بولاشاقتا دا ستۋدەنتتەردىڭ سپورتىن دامىتۋ ماقساتىندا كوپتەگەن ءىس-شارالاردى جۇزەگە اسىرۋدا. رەسپۋبليكالىق ۋنيۆەرسيادا دا ۇزدىك شىققاندار كەلەر جىلعى بۇكىل الەمدىك ۋنيۆەرسياداعا قاتىسۋعا مۇمكىندىك الادى.
بۇل جولى سپورتتىڭ 10 تۇرىنەن سىنعا تۇسەتىن ەلىمىزدىڭ 35 جوعارعى وقۋ ورنىنان كەلگەن 1000 نان اسا ۇمىتكەردىڭ ايانىپ قالماسى انىق. بۇگىننەن باستاپ شىمبۇلاق پەن مەدەۋ، سۇڭقار مەن تالعار ماڭىنداعى «الاتاۋ» سپورت كەشەندەرىنە تارتىستى جارىس باستالادى.