وڭتۇستىكتە بيىل 6 يندۋستريالدى ايماق اشىلادى

استانا. قازاقپارات - وڭتۇستىك قازاقستاندا 19 يندۋستريالدى ايماق قۇرىلۋدا. بۇگىندە ونىڭ تورتەۋى شىمكەنتتە ىسكە اسسا، جالپى كولەمى 153 گەگتار قۇرايتىن 2 يندۋستريالدى ايماق تۇركىستان قالاسى مەن سوزاق اۋدانىندا پايدالانۋعا بەرىلىپ وتىر.

بۇل تۋرالى «وڭتۇستىك» اقپارات ورتالىعىندا وتكەن بريفينگتە «وڭتۇستىك» يندۋستريالدى ايماعى» ج ش س ديرەكتورى م. تۇرابەكوۆ حابارلادى. جىل سوڭىنا دەيىن «وڭتۇستىك» يندۋستريالدى ايماعىن قوسقاندا بۇل كورسەتكىش 12 گە ارتسا، 2016-2017-جىلدارى اۋدان، قالالاردا 7 يندۋستريالدىق ايماقتىڭ قۇرىلىسى اياقتالماق. ولاردىڭ قاتارىندا ارىس قالاسى، سايرام، سارى اعاش، وتىرار، تولەبي، ورداباسى اۋداندارىنداعى يندۋستريالدى ايماقتار مەن شىمكەنت قالاسى ماڭىنداعى اگرو-يندۋستريالدى ايماعى بار.

وسىلايشا وڭىردە ونەركاسىپتىك ءوندىرىس پەن بيزنەس ءۇشىن 975 گەكتار اۋماقتا دايىن ونەركاسىپتىك الاڭدار قالىپتاسپاق. بيىلعى جىلى قازاقستان-تۇركيا بيزنەس فورۋمىندا ەكى ەل باسشىلارىنىڭ كەلىسىمىمەن قازاق-تۇرىك يندۋستريالدى ايماعىن بىرلەسىپ باسقارۋ بويىنشا انكارا قالاسىنىڭ كاسىپكەرلىك پالاتاسى مەن «وڭتۇستىك» يندۋستريالدى ايماقتارىنىڭ باسقارۋشى كومپانياسى» اراسىندا كەلىسىم-شارت جاسالدى.

سونداي-اق، فارماتسيەۆتيكا، ماشينا جاساۋ جانە مەتاللۋرگيا سەكىلدى سالالاردىڭ كلاستەرلىك دامۋىنا باعىتتالعان 292 گەگتار قۇرايتىن «بادام»، «كتيز» جانە «تاسساي» يندۋستريالدى ايماقتارى قۇرىلىپ وتىر. وسى يندۋستريالدى ايماقتارىنا تارتىلعان جەكە ينۆيستيتسيا كولەمى 82 ميلليارد تەڭگەنى ($450 ميلليون) قۇرادى. قازاق-تۇرىك يندۋستريالدى ايماعىمەن قاتار قازاقستان-قىتاي يندۋستريالدى ايماعى قۇرىلماق. بۇل ءۇشىن حىبي، شانشي، شاندۇڭ پروۆينتسياسىندا قىتاي حالىقارالىق ساۋدا پالاتاسىمەن ىنتىماقتاستىق تۋرالى مەموراندۋمعا قول قويىلدى. جالپى، وبلىسىمىزداعى بارلىق يندۋستريالدى ايماقتارىندا قۇنى 176,9 ميلليارد تەڭگەنى قۇرايتىن 148 ينۆيستيتسيالىق جوبا ىسكە اسىپ، ناتيجەسىندە 15829 جاڭا جۇمىس ورنى اشىلدى. ىسكە اسقان جوبالاردىڭ 75 ءسى وبلىسىمىزدىڭ اۋداندارى مەن قالالارىندا ورنالاسقان، دەپ حابارلايدى و ق و اكىمىنىڭ باسپا ءسوز قىزمەتىنەن.