بۇل تۋرالى الماتى قالالىق قوعامدىق دەنساۋلىق ساقتاۋ باسقارماسىنىڭ باسپا ءسوز قىزمەتى ءمالىم ەتتى، دەپ حابارلايدى قازاقپارات ءتىلشىسى.
ۆەدومستۆونىڭ مالىمەتىنشە الماتى ونكولوگيالىق ورتالىعىنا ۇيقى بەزى باسىنىڭ ىسىگىنە شالدىققان 69 جاستاعى ايەل تۇسكەن. وعان ونكوحيرۋرگيا بولىمشەسىنىڭ مەڭگەرۋشىسى نۇرلان بالتايەۆ العاش رەت لاپاروسكوپيالىق گاستروپانكرەاتودۋدەنالدى رەزەكسيا - ۋيپپل وتاسىن جاسادى.
«كەسپەي جاسالاتىن وتا كەزىندە حيرۋرگ ءبىر مەزگىلدە ۇيقى بەزىنىڭ باسىن، اسقازاننىڭ ديستالدى بولىگىن، ون ەكى ەلى ىشەكتى، اش ىشەكتىڭ باستاپقى بولىگىن، ءوت جولدارىنىڭ بولىگىن، ءوت قابىن جانە ايماقتىق ليمفا تۇيىندەرىن الىپ تاستادى. بۇرىن مۇنداي دياگنوز قويىلعان كەزدە وتا ءداستۇرلى ادىسپەن - حيرۋرگيالىق كەسۋ ارقىلى جاسالاتىن. بۇل ءوز كەزەگىندە ەمدەلۋشىگە زاقىم كەلتىرەتىن، سەبەبى، وتادان كەيىنگى كەزەڭدە تەرەڭ جارالاردىڭ، باسقا دا كۇردەلى اسقىنۋلاردىڭ دامۋ ىقتيمالدىعى جوعارى بولاتىن. بۇل جولى الماتىلىق ونكولوگتار وتانى شاعىن ينۆازيۆتى ءادىس - لاپاروسكوپيا ارقىلى بىرنەشە جەردەن تەسىپ جاسادى. مۇنداي وتالار از زاقىمدى ارالاسۋ بولىپ تابىلاتىنىن ايتۋ كەرەك»، - دەپ حابارلادى قوعامدىق دەنساۋلىق ساقتاۋ باسقارماسىنىڭ باسپا ءسوز قىزمەتى.
ونكوحيرۋرگيا بولىمشەسىنىڭ مەڭگەرۋشىسى نۇرلان بالتايەۆتىڭ ايتۋىنشا، ونداعان جىلدار بويى گاستروپانكرەاتودۋودەنالدى رەزەكتسيانىڭ ناتيجەلەرى ناشار بولعان.
«ولاردى كوپتەگەن اسقىنۋلار، ءولىم-ءجىتىمنىڭ ايتارلىقتاي جوعارى دەڭگەيىمەن سيپاتتاۋعا بولاتىن. قازىرگى تاڭدا اتالعان وتانىڭ دالەلدەنگەن تەحنيكاسى، وتالىق بولمەنىڭ زاماناۋي جابدىقتالۋى جانە انەستەزيولوگتار مەن رەانيماتولوگتاردىڭ جوعارى كاسىبي دايىندىعى ارقاسىندا ارالاسۋدىڭ بۇل ءتۇرى ەڭ از اسقىنۋ جانە وتادان كەيىنگى ءولىم-جىتىممەن سيپاتتالىپ، ۇزاق ۋاقىت بويى جاقسى ناتيجە بەرەدى. وتا 7 ساعاتتان استام ۋاقىتقا سوزىلدى. قان جوعالتۋ 200 م ل-دى قۇرادى. ناۋقاس وتادان كەيىنگى ءبىرىنشى كۇنى-اق ءوزىن جاقسى سەزىندى»، - دەدى نۇرلان بالتايەۆ.
ايتا كەتەيىك، سوڭعى بەس جىل ىشىندە الماتى ونكولوگيالىق ورتالىعىندا ءداستۇرلى كەسۋ ءادىسى ارقىلى 92 گاستروپانكرەتودۋودەنالدى رەزەكسيا جاسالعان. ەندى قالالىق ونكولوگيالىق ورتالىقتا مۇنداي وتالار شاعىن ينۆازيۆتى ادىسپەن جاسالاتىن بولادى.