قازاقستان شۆەيتساريادان 66 ەسە ۇلكەن، ءبىراق ورتاق تۇستارىمىز كوپ - ديپلومات
«بارشاڭىزعا بەلگىلى، سۋ تاقىرىبى الەمنىڭ كوپتەگەن ءوڭىرى ءۇشىن، سونداي- اق ورتالىق ازيا ءۇشىن ماڭىزدى ماسەلە بولىپ وتىر. ال شۆەيتساريا ءوز تاۋلارى ارقىلى فرانسيانى، گەرمانيانى، اۋستريانى سۋمەن قامتيدى، ياعني جۇزدەگەن جىلدار بويى سۋ ماسەلەسىنەن حاباردارمىز. بىزدە سۋ قاتىناستارى تۋرالى ءالى دە قىزۋ پىكىرتالاس بار. ەگەر سىزدەرگە سۋدىڭ دۇرىس جانە ءادىل ءبولىنۋى بويىنشا قانداي دا ءبىر قولداۋ كورسەتە الساق، كومەكتەسۋگە دايىنبىز»، - دەدى ينياتسيو كاسسيس ەلوردادا سىرتقى ىستەر مينيسترلىگىندە وتكەن بريفينگتە.
ونىڭ ايتۋىنشا، قازاقستان ۇكىمەتى وسى تاقىرىپتى تەرەڭىرەك تالقىلاۋ ءۇشىن جانە شۆەيتساريادا تاۋلار ارقىلى سۋ بولۋدە قانداي جۇمىس جۇرگىزىلگەنىن كورسەتۋ ءۇشىن ساراپشىلار دەلەگاتسياسىن جىبەرۋدى سۇراعان.
«استانا مەن الماتىداعى ەكى كۇندىك باعدارلامامدا قازاق مادەنيەتى مەن لاندشافتارىنىڭ الۋان تۇرلىلىگىمەن تانىسۋعا مۇمكىندىك الدىم، ول ءۇشىن سىزدەرگە العىسىم شەكسىز. قازاقستان شۆەيتساريادان 66 ەسە ۇلكەن، حالقى 2 ەسە كوپ. گەوگرافيالىق قاشىقتىققا جانە ءبىزدىڭ ەلدەرىمىزدىڭ ءارتۇرلى ولشەمدەرىنە قاراماستان، بىزدە كوپتەگەن ۇقساستىق بار. اتاپ ايتقاندا، ۇشاعىمىز قونعاندا كەرەمەت تاۋلاردى كوردىك، وزەن- كولدەردىڭ كوپتىگى، حالىقتىڭ بىرنەشە تىلدە سويلەۋى ماسەلەسى دە بىزگە جاقسى تانىس. سوندىقتان، پىكىر الماسقاندارىڭىز ءۇشىن، قوناقجايلىلىعىڭىز ءۇشىن العىس ايتامىن. كوپ راحمەت»، - دەدى ديپلومات.
ايتا كەتەيىك، شۆەيتساريا سىرتقى ىستەر فەدەرالدىق دەپارتامەنتىنىڭ باسشىسى ينياتسيو كاسسيس قازاقستانعا رەسمي ساپارمەن كەلدى.