قىزىلوردادا 6600 ازاماتقا جەر بەرىلدى
11:40, 05 - شىلدە 2016
استانا. قازاقپارات - بۇگىن قىزىلوردا قالاسىندا 6600 ازاماتقا تۇرعىن ءۇي سالۋ ءۇشىن جەر بەرىلدى. بۇل تۋرالى ازاتتىق راديوسى حابارلادى.
ازاماتتارعا جەر بەرۋ ءۇشىن قىزىلوردا- جەزقازعان تاس جولىنىڭ بويىنان 980 گەكتار جەر بولىنگەن. بۇل جەردە ەندى «بايتەرەك» دەپ اتالاتىن جاڭا مولتەك اۋدان قۇرىلادى.
وبلىس اكىمدىگىنىڭ مالىمدەۋىنشە، جاڭا مولتەك اۋدانعا الداعى ۋاقىتتا 75 شاقىرىم جول سالىنىپ، 353 شاقىرىم سۋ جۇيەسى، 112 شاقىرىم گاز قۇبىرى، 152 شاقىرىم ەلەكتر جەلىلەرى تارتىلادى. بۇل ءۇشىن بيۋدجەتتەن 10 ميلليارد تەڭگەگە جۋىق قارجى بولىنەدى.
بۇل وبلىستا سوڭعى رەت حالىققا جەر تەلىمى 2004 -جىلى بەرىلگەن. قازىر قىزىلوردادا ءالى 42 مىڭ ازامات جەر الۋ كەزەگىندە تۇر.