بيىل پروكۋرورلار 65 سوتتالۋشىنىڭ جاعدايىن جاقسارتتى نەمەسە اقتادى - باس پروكۋرور
بۇل تۋرالى مەملەكەتتىك ايىپتاۋشىلار فورۋمىندا باس پروكۋرور بەرىك اسىلوۆ ايتتى، دەپ حابارلايدى قازاقپارات ءتىلشىسى.
«زاڭدى، ءادىل ءارى نەگىزدى ايىپتى قولداۋ - ءىس بويىنشا دۇرىس شەشىمنىڭ جانە ادام قۇقىعىن قورعاۋدىڭ كەپىلى. كونستيتۋتسيامەن بەلگىلەنگەن بۇل مىندەت پروكۋرورلارعا ەرەكشە جاۋاپكەرشىلىك جۇكتەيدى. مەملەكەتتىك ايىپتاۋشى قوعام مەن اقپارات قۇرالدارىنىڭ ەرەكشە نازارىندا ەكەنى بەلگىلى. ونىڭ بىلىكتىلىگىنە قاراپ، حالىق جالپى پروكۋراتۋرا ورگاندارىنا باعا بەرەدى»، - دەدى ول.
باس پروكۋرور بۇگىنگى ءىس-شارا مەملەكەتتىك ايىپتاۋ ساپاسىن ارتتىرۋداعى پروبلەمالار مەن ناقتى قادامداردى تالقىلاۋ ماقساتىندا ۇيىمداستىرىلعانىن ايتتى.
«بۇل جەردە كوپتەگەن سۇراق قوردالانىپ قالدى. ادىلدىك ىزدەگەن ادامدار وڭىرلەردەن بىزگە، جوعارعى سوتقا جانە پرەزيدەنت اكىمشىلىگىنە كەلەدى. ماعان دا ولاردى ءجيى جەكە قابىلداۋعا تۋرا كەلەدى. كوپشىلىگى ءتۇرلى ساتىعا بىرنەشە مارتە جۇگىنگەن. پروكۋرورلاردىڭ اتىنا دا سوگىسسىز بولمايدى. وعان تۇسىنىستىكپەن قارايمىن. ويتكەنى، ءار ءىستىڭ ارتىندا ادامنىڭ، ونىڭ وتباسىنىڭ، تۋعان-تۋىستارى مەن جاقىندارىنىڭ تاعدىرى جاتىر. وكىنىشكە وراي، كەيبىر قاتەلىكتەردى كاسساتسيادا تۇزەتۋگە تۋرا كەلەدى. تەك وسى جىلى عانا ءبىزدىڭ نارازىلىعىمىزبەن 65 سوتتالۋشىنىڭ جاعدايى جاقساردى نەمەسە اقتالدى»، - دەدى باس پروكۋرور.