وسى اپتادا رەسەي اسكەرى دونەتسك وبلىسىنداعى بىرنەشە شاھاردى باسىپ الدى. ال ۋكراينا بيلىگى حاركوۆتاعى مەترو ستانسياسىن قايتا اشتى. وسى اپتادا رەسەي اسكەرى دونەتسك وبلىسىنداعى 3 قالانى باسىپ الدى. ۋكراينا قورعانىس مينيسترلىگىنىڭ وكىلدەرى مۇنى ۋاقىتشا جەتىستىك دەپ وتىر. رەسەي قارۋلى كۇشتەرى لۋگانسك وبلىسىنىڭ 95 پايىزىن دا ءوز باقىلاۋىنا العان. بۇل تۋرالى ايماقتىق اسكەري اكىمشىلىك باسشىسى سەرگەي گايداي مالىمدەدى.
كرەملدىڭ حابارلاۋىنشا، بۇعان دەيىن رەسەي اسكەرىنىڭ باقىلاۋىنا وتكەن ماريۋپول قالاسىنداعى تەڭىز ايلاعى جۇمىسىن قايتا باستادى. مۇندا مينيدان تازارتۋ جۇمىستارى اياقتالدى. ءسويتىپ اسكەري ءىس- قيمىلدار باستالعالى پورتقا العاش رەت كەمە كىردى. رەسەيلىك سۋ كولىگى 2 جارىم مىڭ توننادان اس مەتالل تيەپ بولعاسىن، دونداعى روستوۆ قالاسىنا بەت الادى. ۋكراينا تارابى مۇنى توناۋشىلىققا تەڭەيتىندەرىن جەتكىزدى.
گەرمانيا مەن فرانسيا باسشىلارى تەلەفون ارقىلى سويلەسۋ كەزىندە رەسەي پرەزيدەنتىنەن وسى ماريۋپول قالاسىندا ورنالاسقان «ازوۆستال» زاۋىتىنا بەكىنىپ، كەيىن بەرىلگەن ۋكراين ساربازدارىن بوساتۋدى سۇراعان. 16- مامىردان بەرى مۇندا 2 مىڭ 400 ۋكراينالىق جاۋىنگەر قارۋىن تاپسىرىپ، ءوز ەركىمەن بەرىلگەن بولاتىن.
ماريا زاحاروۆا، ر ف سىرتقى ىستەر مينيسترلىگىنىڭ رەسمي وكىلى:
- دونەتسك حالىق رەسپۋبليكاسىنىڭ ۇكىمەتى «ازوۆستالدا» بولعان ۇلتشىلدار ءۇشىن حالىقارالىق تريبۋنال وتكىزۋدى جوسپارلاپ وتىر. قازىر ونىڭ جارعىسى جاسالىپ جاتىر. ءبىز بۇل باستامانى قولدايمىز.
وسى اپتادا 3 ايلىق ۇزىلىستەن كەيىن حاركوۆتە مەترو ستانتسيالارى قايتادان جۇمىسىن باستادى. پويىزدار بارلىق باعىت بويىنشا قاتىنايدى. قوزعالىس ينتەرۆالى 30 مينۋت. شاھار باسشىسى يگور تەرەحوۆتىڭ ايتۋىنشا، جولاۋشىلار سانى ارتسا، ينتەرۆال دا قىسقارادى. العاشىندا جول ءجۇرۋ تۇرعىندارعا تەگىن بولماق. بۇدان بولەك ازاماتتار مەترو ستانسيالارىن اۋە دابىلى كەزىندە پانالاي الادى.
ال رەسەيدە كەلىسىم- شارت بويىنشا اسكەري قىزمەت ەتەتىندەر ءۇشىن جاسىنا قاتىستى شەكتەۋلەر الىندى. بۇعان دەيىن زاڭعا ءتيىستى تۇزەتۋلەر ەنگىزۋدى مەملەكەتتىك دۋما قابىلداعان. ەندى فەدەراتسيا كەڭەسى ماقۇلدادى. بۇرىن رەسەي ازاماتتارى 40 جاسقا دەيىن عانا كەلىسىم- شارت بويىنشا اسكەري قىزمەت اتقارا الاتىن. ال شەتەلدىكتەر ءۇشىن بۇل مەجە 30-دان اسپاۋ كەرەك ەدى. جاڭا تالاپ بويىنشا ەر ازاماتتار زەينەتكە شىعۋ جاسىنا دەيىن، ياعني 65 جاسقا دەيىن ءتيىستى كەلىسىم- شارتقا وتىرا الادى. دەپۋتاتتاردىڭ ايتۋىنشا، سونىڭ ارقاسىندا قارۋلى كۇشتەر قاتارىنا جۇرگىزۋشىلەر، اسپازدار مەن فەلدشەرلەردى كوپتەپ تارتۋعا مۇمىندىك تۋادى.
www.24.kz