شاراعا قاتىسقان ايماق باسشىسى ەرمەك مارجىقپايەۆ تۇرعىنداردى كونستيتۋتسيا كۇنىمەن قۇتتىقتاي كەلە، جاڭا پاتەردىڭ كىلتىن تابىس ەتتى. باسپانالى بولعانداردىڭ باسىم كوپشىلىگى - ۇزاق ۋاقىت پاتەر كەزەگىندە تۇرعاندار. ايماق باسشىسى ءوز سوزىندە مەملەكەت ساياساتىنىڭ باستى باعىتى - ءار قازاقستاندىق وتباسىن باسپانامەن قامتۋ ەكەنىن اتاپ ءوتتى. سوڭعى جىلدارى وبلىستا 3 ميلليوننان استام شارشى مەتر باسپانا بەرىلگەن.
«وسى ماقساتتا ەلىمىزدە ءتيىستى باعدارلامالار بار. بۇعان ءبىزدىڭ وبلىسىمىز بەلسەندى قاتىسۋدا. بيىل وبلىستا 570 مىڭ شارشى مەتر، ونىڭ ىشىندە كوكشەتاۋ قالاسىنىڭ وزىندە 240 مىڭ شارشى مەتر باسپانا بەرۋ جوسپارلانعان»، - دەدى ەرمەك مارجىقپايەۆ.
بۇل جولى باسپانالى بولعان 65 وتباسىنىڭ 25 ءى جاڭا پاتەردىڭ كىلتىن سالتاناتتى جاعدايدا اكىمنىڭ قولىنان الدى. سونىمەن بىرگە، ايماق باسشىسى مەديتسينالىق مەكەمەلەرگە قىزمەتتىك سۋ جاڭا اۆتوكولىكتەردىڭ كىلتىن تابىس ەتتى. ەسكە سالا كەتەيىك ، وسىعان دەيىن كونستيتۋتسيا كۇنى قارساڭىندا بۇلاندى اۋدانىنىڭ ورتالىعى - ماكينسك قالاسىندا جاڭادان سالىنعان 45 جانە 60 پاتەرلى ەكى ۇيدەن جاڭا پاتەرلەردىڭ كىلتى تاپسىرىلعان بولاتىن.