الماتى وبلىسىنىڭ 65 ستۋدەنتى پولشادا تەگىن وقيتىن بولدى
بۇل تۋرالى وبلىس اكىمىنىڭ ورىنباسارى جاقسىلىق ومار باستاعان جەتىسۋلىق دەلەگاتسيانىڭ پولشا رەسپۋبليكاسىنىڭ ليۋبلين ۆويەۆودتىعىنا جاساعان ساپارى بارىسىندا كەلىسىلدى، دەپ حابارلايدى الماتى وبلىسى اكىمدىگىنىڭ رەسمي سايتى.
بۇل ساپاردىڭ باستى ماقساتى - قازاقستان رەسپۋبليكاسى پرەزيدەنتى نۇرسۇلتان ءابىش ۇلى نازاربايەۆتىڭ وتكەن جىلى پولشا رەسپۋبليكاسىنا جاساعان ساپارىنداعى كەلىسىمدەرگە وراي ەلارالىق ىنتىماقتاستىقتى دامىتۋ. وسى ساپار بارىسىندا ءوڭىرارالىق ارىپتەستىك بايلانىستاردى ودان ءارى نىعايتۋ تۋرالى كەلىسىمدەر جاسالدى. دەلەگاتسيا مۇشەلەرى ليۋبلين ۆويەۆودتىعىنىڭ مارشالەگى (باسشىسى) سلاۆومير سوسنوۆسكيمەن كەزدەسىپ، ليۋبليندەگى اۋرۋحانادا، بالالار ەمحاناسىندا، ەكونوميكا جانە يننوۆاتسيا جوعارى مەكتەبىندە، بيالا-پودلياسكا قالاسىنداعى مەديتسينالىق ورتالىقتا بولدى. باعدارلاما بارىسىنداعى شارالار ناتيجەسىندە ەكى تاراپ قازاقستاننىڭ 35 ستۋدەنتىن ورتا بۋىندى مەديتسينا قىزمەتكەرلەرىن ەۋروپالىق باعدارلامامەن دايىنداۋ ماقساتىندا 3,5 جىل ليۋبلين جانە بيالا-پودلياسكا قالالارىنداعى پولياك ۋنيۆەرسيتەتتەرىندە وقىتۋ جونىندە شەشىمگە كەلدى.
سونىمەن قاتار ەكونوميكا، مەنەدجمەنت جانە ينفورماتيكا بويىنشا 30 ماماندى وقىتۋ تۋرالى دا كەلىسىلدى. قازاقستاندىقتاردىڭ وقۋى مەن پولشادا تۇرۋ شىعىندارىنىڭ بارلىعىن پولياك جاعى كوتەرەتىن بولادى.
ليۋبلين ۆويەۆودتىعىنىڭ مارشالەگى باستاعان پولياك كاسىپكەرلەرىنىڭ ءبىر توبى بيىلعى جىلدىڭ قىركۇيەك ايىنىڭ باسىندا استاناعا ەكسپو-2017 كورمەسىنە كەلۋدى جوسپارلاپ وتىر. ءوز كەزەگىندە قازاقستاندىق دەلەگاتسيانىڭ جەتەكشىسى ۇزاق مەرزىمدى ءوڭىرارالىق ىنتىماقتاستىقتى ورنىقتىرۋ ماقساتىندا پولياك وكىلدەرىن الماتى وبلىسىنا ساپارلاپ كەلۋگە شاقىردى.
سونداي-اق 2017-جىلعى 25- شىلدەدە ۆارشاۆادا قازاقستاننىڭ پولشاداعى توتەنشە جانە وكىلەتتى ەلشىسى مارعۇلان بايمۇحان مەن الماتى وبلىسى اكىمىنىڭ ورىنباسارى جاقسىلىق وماردىڭ پولشا دامۋ ۆيتسە-ءمينيسترى ءارى قازاقستان-پولشا ەكونوميكالىق ىنتىماقتاستىعى جونىندەگى ۇكىمەتارالىق كوميسسيانىڭ تەڭ ءتوراعاسى تادەۋش كوستسينسكيمەن كەزدەسۋى ءوتتى. كەزدەسۋدە قوس تاراپ ءوزارا قارىم-قاتىناستىڭ ءوڭىرارالىق دەڭگەيى جونىندەگى ماسەلەلەردى تالقىلادى.