بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا ءمالىم ەتتى، دەپ حابارلايدى قازاقپارات ءتىلشىسى.
«بىلتىر 11 ايدا بانكتەردىڭ جەكە تۇلعالارعا بەرگەن نەسيەسى 29,4 پايىزعا نەمەسە 13,9 تريلليون تەڭگەگە ۇلعايدى. ونىڭ ىشىندە تۇتىنۋشىلىق كرەديتتەر كولەمى 24,1 پايىزعا، ياعني 7,6 تريلليون تەڭگەگە ءوستى. زايم الۋشىلاردىڭ جالپى سانى 6868 مىڭ ادامعا جەتتى. تولەۋ مەرزىمى 90 كۇننەن اسقان كرەديتتەردىڭ ۇلەسى - 5,6 پايىز نەمەسە 461 ميلليارد تەڭگە. 536 مىڭ كليەنتتىڭ كرەديتىن تولەۋ مەرزىمى 90 كۇننەن اسىپ كەتكەن. ال، بيىل جىل باستالعالى ولاردىڭ سانى 121 مىڭ ادامعا ارتتى»، - دەدى ءمادينا ءابىلقاسىموۆا ۇكىمەت وتىرىسىندا.
اگەنتتىك ۇسىنعان مالىمەتكە سايكەس، تولەم بويىنشا پروبلەمالى زايم الۋشىلار سانى - 532 مىڭ. جىل باستالعالى بۇل ساناتتاعىلار 186 مىڭ ادامعا ازايعان. قارىز الۋشىلاردىڭ 76 پايىزىندا 1 ميلليون تەڭگەگە دەيىن بەرەشەگى بار.
«بىلتىرعى جىلدىڭ 11 ايىندا ميكروقارجى ۇيىمدارى بەرگەن شاعىن نەسيەلەر كولەمى 42,7 پايىزعا نەمەسە 979 ميلليارد تەڭگەگە دەيىن ءوستى. ميكروكرەديت الۋشىلار سانى - 1528 مىڭ ادام. مەرزىمى 90 كۇننەن اساتىن ميكروكرەديتتەردىڭ ۇلەسى - 8,0 پايىز نەمەسە 76 ميلليارد تەڭگە. اتالعان مەرزىم ىشىندە تولەمەي جۇرگەندەر 257 مىڭ ادامعا جەتتى. بۇل كورسەتكىش جىل باستالعالى 115 مىڭ ادامعا ازايدى»، - دەيدى ول.