قىزىلوردادا بوتەن بىرەۋدىڭ اتىنا ونلاين نەسيە راسىمدەگەن 64 الاياق ۇستالدى
قىزىلوردا وبلىستىق پوليتسيا دەپارتامەنتىنىڭ مالىمەتتەرىنە قاراعاندا، الاياقتار بوتەن بىرەۋدىڭ جەكە دەرەكتەرىن تەلەفون ارقىلى ءبىلىپ الادى، سودان سوڭ ولاردىڭ اتىنا نەسيە راسىمدەيدى.
«الاياقتار سمارتفون ارقىلى وزگە بىرەۋدىڭ بانك قوسىمشاسىنا كىرەدى. ولاردىڭ اراسىندا ءتىپتى ەلەكتروندى سيفرلى قولتاڭبانى بۇزا الاتىندارى كەزدەسەدى. بيىلعى جىلدىڭ 3 ايىندا وبلىس بويىنشا 64 ازامات وسىنداي الاياققا الدانعان»، - دەپ ءمالىم ەتتى قىزىلوردا وبلىستىق پوليتسيا دەپارتامەنتىنەن.
ۆەدومستۆو مالىمەتىنە قاراعاندا، وسىنداي وقيعانىڭ ءبىرى جالاعاش اۋدانىندا تىركەلدى. وندا جەرگىلىكتى تۇرعىن تانىسىنىڭ ۇيالى تەلەفونىن سۇراپ الىپ، 495 مىڭ تەڭگە ونلاين نەسيە راسىمدەگەن. بۇل ارەكەت بويىنشا ق ر قىلمىستىق كودەكسىنىڭ 190-بابىنىڭ 2-بولىگى 4-تارماعى نەگىزىندە سوتقا دەيىنگى تەرگەپ- تەكسەرۋ ارەكەتتەرى ءجۇرىپ جاتىر. ەسكە سالساق، قىزىلوردا وبلىسىندا الاياقتىق قىلمىسى 54,4 پايىزعا ازايدى.