بۇل «الەم ارۋى» بايقاۋى 63 جىلدا ءبىرىنشى رەت بيكينيسىز وتپەك

استانا. قازاقپارات - الەمدەگى ەڭ باستى سۇلۋلىق سايىسى - «الەم ارۋى» بايقاۋىنىڭ ۇيىمداستىرۋشىلارى قارار قابىلدادى.

وعان سايكەس، ەندى بايقاۋ باعدارلاماسىنان اشىق-شاشىق ءجۇزۋ كيىمىمەن پوديۋم ارقىلى ءجۇرىپ ءوتۋ بولىگى الىنىپ تاستالماق.

ءسان دوداسىنىڭ وكىلدەرى اتاپ وتكەندەي، بيكيني بايقاۋ قاتىسۋشىلارنىن دا، كورەرمەندەردى دە شارانىڭ نەگىزگى الەۋمەتتىك مىندەتتەرىنەن الاستاتىپ جىبەرگەن، دەپ جازادى ABC News.

«ءبىزدىڭ بايقاۋ جاي عانا سۇلۋلىققا ەمەس، بەلگىلى ءبىر ماقساتقا قىزمەت ەتۋگە نەگىزدەلگەن سۇلۋلىققا ارنالادى. وسى تۇرعىدان العاندا بايقاۋدىڭ بيكيني بولىگى مۇلدە قيسىنسىز»، - دەپ ءمالىم ەتتى Miss World America/Miss United States بايقاۋىنىڭ ديرەكتورى كريس ۋيلمەر.

«الەم ارۋى» مارتەبەسىنىڭ يەگەرى -  اۋىلداعى ەڭ سۇلۋ قىز ەمەس، جومارتتىقتىڭ، جاقسىلىق پەن بەيبىتشىلىكتىڭ، ءۇمىتتىڭ جارشىسى»، - دەپ قوستى ۋيلمەر.

جۋرناليستەردىڭ ايتۋىنشا، الەمگە ايگىلى سۇلۋلار سايىسى ءبىرشاما وزگەرىسكە ۇشىراعان. ۇيىمداستىرۋشىلار شوۋدىڭ نەگىزگى راۋندى رەتىندە قىزداردىڭ قوعامدىق ماڭىزدى ماسەلەلەردى كوتەرىپ، كورەرمەندەردى جومارتتىققا، قايىرىمدىلىققا شاقىراتىن بولىگىنە دەن قويادى.

دەگەنمەن، بيكينيدەن باس تارتۋ بايقاۋدا جاز تاقىرىبىن مۇلدە قوزعاماۋ دەگەندى بىلدىرمەيدى. ەندى نازىك جاندىلار پوديۋمعا ءجۇزۋ كيىمىمەن ەمەس، جاعاجايدا كيۋگە ارنالعان جەڭىل كويلەكتەرمەن كوتەرىلەتىن بولادى.

وسىلايشا، «الەم ارۋى» بينيكي شوۋىنان ءسان كورسەتىلىمىنە اۋىسادى، دەگەن پىكىردە ۇيىمداستىرۋشىلار.

BNews.kz