الپىس ءۇش جىل بۇرىن جوعالعان ايەل تابىلدى

ا ق ش-تىڭ ۆيسكونسين شتاتىندا 63 جىل بۇرىن ءىز-ءتۇزسىز جوعالىپ كەتكەن ايەل ءدىن امان كۇيىندە تابىلدى، دەپ حابارلايدى Baq. kz ءتىلشىسى The Guardian باسىلىمىنا سىلتەمە جاساپ.

ودري بەكەبەرگ 1962 -جىلدىڭ شىلدەسىندە جوعالىپ كەتكەن ەدى: ول اقشا تابۋ ءۇشىن جۇمىسقا كەتىپ، قايتىپ ورالماعان. جوعالعان كەزدە ول 20 جاستا بولعان جانە سوك وكرۋگىندەگى ريدسبۋرگ قالاسىندا تۇرعان. ونىڭ ەكى بالاسى مەن كۇيەۋى بولعان. نەبارى 15 جاسىندا تۇرمىسقا شىققان. جوعالار الدىندا ول كۇيەۋىنىڭ ۇرىپ-سوعاتىنىن جانە قورقىتاتىنىن ايتىپ جۇرگەن.

كوپ جىلدار بويى تەرگەۋشىلەر ونى تابۋعا تىرىسقانىمەن، بارلىق كۇش-جىگەرگە قاراماستان ءىس توقتاپ قالعان.

2025 -جىلدىڭ باسىندا بۇل ءىس قايتا قارالىپ، بەكەبەرگتى تابۋدىڭ ءساتى ءتۇستى. بەلگىلى بولعانداي، ول ءتىرى، دەنساۋلىعى جاقسى جانە شتات اۋماعىنان تىس جەردە تۇرىپ جاتىر. ونىڭ بۇل شەشىمى - ءوز ەركىمەن بولعان.

ىسپەن اينالىسقان دەتەكتيۆ ايزەك حانسوننىڭ ايتۋىنشا، وعان گەنەالوگيالىق سايت كومەكتەسكەن: ول سول جەردەن بەكەبەرگتىڭ اپكەسىنىڭ اككاۋنتىن تاۋىپ، سونىڭ كومەگىمەن ءىز-ءتۇزسىز كەتكەن ايەلدىڭ جاڭا مەكەن-جايىنا قول جەتكىزگەن. كەيىن جەرگىلىكتى پوليتسيامەن بايلانىسىپ، سول مەكەن-جايعا بارۋدى سۇرايدى. بار-جوعى 45 مينۋتتان سوڭ ول ودري بەكەبەرگتىڭ وزىمەن تەلەفون ارقىلى سويلەسكەن. حانسون ايەلدىڭ باقىتتى كورىنگەنىن جانە ءوز تاڭداۋىنا وكىنبەيتىنىن ايتتى.