قىزىلوردالىق 62 تۇلەك رەسەيدىڭ ءبىلىم گرانتتارىن ۇتىپ الدى
2017-2018 وقۋ جىلىندا ماسكەۋ ۇلتتىق تەحنولوگيالىق زەرتتەۋ ينستيتۋتىنا (م ي س ي س) - 14 تۇلەك، ك. تيميريازيەۆ اتىنداعى رەسەي مەملەكەتتىك اگرارلىق ۋنيۆەرسيتەتىنە - 24، سانكت- پەتەربۋرگ مەملەكەتتىك وندىرىستىك تەحنولوگيالار جانە ديزاين ۋنيۆەرسيتەتىنە - 24 بالا وقۋعا ءتۇستى. بارلىعى 62 تۇلەك ءبىلىم گرانتتارىنا يە بولدى. بۇل تۋرالى قىزىلوردا وبلىسىنىڭ اكىمى قىرىمبەك كوشەربايەۆتىڭ رەسەي فەدەراتسياسىنىڭ جەتەكشى وقۋ ورىندارىندا وقيتىن قىزىلوردالىق جاستارمەن كەزدەسۋىندە ايتىلدى.
«ايماققا قاجەتتى مامانداردى دايارلاۋ ماقساتىندا سىردىڭ وزدەرىڭدەي تالاپتى تۇلەكتەرى ماسكەۋ مەن سانكت- پەتەربۋرگتىڭ ەڭ بەدەلدى جوعارى وقۋ ورىندارىنا ءتۇسىپ، رەسەي مەملەكەتىنىڭ ەسەبىنەن ءبىلىم الۋدا. وسى باستامانىڭ ارقاسىندا ءۇش جىل ىشىندە 400 گە جۋىق تۇلەگىمىز وقۋعا قابىلدانسا، بيىل ولاردىڭ قاتارى تاعى دا 62 تۇلەكپەن تولىعىپ وتىر. بولاشاقتا وسى تۇلەكتەر ەلگە ورالىپ، IT، تاۋ- كەن، مەتاللۋرگيا، مۇناي، كۇردەلى قوسىلىمدار، قۇرىلىس، اۋىل شارۋاشىلىعى ونىمدەرىن وڭدەۋ، تاعى باسقا سالالاردا ايماقتا يندۋستريالدى- يننوۆاتسيالىق جوبالاردىڭ ءساتتى ىسكە اسۋىنا، ەكونوميكامىزدىڭ وركەندەۋىنە وزدەرىنىڭ ۇلەسىن قوساتىن بولادى دەپ ۇمىتتەنەمىز»، - دەدى وبلىس اكىمى ق. كوشەربايەۆ.
2014 -جىلدان باستاپ قىزىلوردالىق 390 ستۋدەنت رەسەي فەدەراتسياسى ۇكىمەتىنىڭ قارجىسى ەسەبىنەن ماسكەۋ ۇلتتىق تەحنولوگيالىق زەرتتەۋ ينستيتۋتىندا 19 ماماندىق بويىنشا - 204 ستۋدەنت، ك. تيميريازيەۆ اتىنداعى رەسەي مەملەكەتتىك اگرارلىق ۋنيۆەرسيتەتىندە 22 ماماندىق بويىنشا - 98 جانە سانكت- پەتەربۋرگ مەملەكەتتىك وندىرىستىك تەحنولوگيالار جانە ديزاين ۋنيۆەرسيتەتىندە - 21 ستۋدەنت ءبىلىم الۋدا.
الداعى جىلى العاشقى تۇلەكتەر تۇلەپ ۇشادى دەپ كۇتىلۋدە. وقۋ ورنىن جوعارى باللمەن اياقتاعان سۋتدەنتتەر «سكولكوۆو عىلىم جانە تەحنولوگيالار» ينستيتۋتىندا "ماگيستراتۋرا" باعدارلاماسىن جالعاستىرادى.
بۇدان بولەك، بيىل 10 سالا بويىنشا وبلىس اكىمىنىڭ 182 ءبىلىم گرانتى ءبولىندى.
ايتا كەتۋ كەرەك، ءبىلىم گرانتتارى الەۋمەتتىك از قامتىلعان جانە كوپ بالالى وتباسىدان شىققان بالالارعا بەرىلۋدە.
«2013 -جىلدان باستاپ وبلىس اكىمىنىڭ ءبىلىم گرانتى الەۋمەتتىك از قامتىلعان جانە كوپ بالالى وتباسىدان شىققان، اسىرەسە اۋىلدىق جەرلەردەن شىققان بالالارعا بەرىلۋدە. 2017 -جىلعا دەيىن بارلىعى 512 تۇلەك وبلىس اكىمىنىڭ ءبىلىم گرانتىنا يە بولدى. بيىل ءتۇرلى سالالار بويىنشا 182 گرانت قوستىق. وسى ماقساتا وبلىستىق بيۋدجەتتەن 101,7 ميلليون تەڭگە قارجى ءبولىندى»، - دەدى وبلىستىق ءبىلىم باسقارماسىنىڭ باسشىسى باحىتجان سايلىبايەۆ.
دەپارتامەنتتىڭ مالىمەتتەرىنە قاراعاندا، وسى جىلى تەحنيكالىق ماماندىقتارعا 40 گرانت بولىنسە، ونىڭ 10 ى الماتى ەنەرگەتيكا جانە بايلانىس ۋنيۆەرسيتەتىندە «ەلەكتروەنەرگەتيكا» ماماندىعى بويىنشا وقيتىن بولادى. ا و ك سالاسىنداعى ماماندىقتارعا تاعى - 20 گرانت ءبولىندى. ونەر سالاسىنا - 27, ال ارحەولوگيا مەن ەتنولوگياعا - 5 گرانت ءبولىندى. پەداگوگيكالىق كادرلار دايىنداۋعا 50 گرانت بولىنسە، تاعى 20 گرانت جاس دارىگەرلەرگە رەزيدەنتۋرادا وقۋ ماقساتىندا قارالدى. سونىمەن قاتار 1 گرانت «جالپى تاجىريبە دارىگەرى» ماماندىعى بويىنشا م. وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىندە وقۋ ءۇشىن ءبولىندى. سونىمەن بىرگە 5 گرانت «جەرگە ورنالاستىرۋ» ماماندىعىنا، 3 گرانت «اقپاراتتىق قاۋىپسىزدىك» ماماندىعىنا، ال 1 گرانت «جۋرناليستيكا» ماماندىعىنا ءبولىندى. 2013 -جىلدان بەرى 694 ءبىلىم گرانتى ءبولىنىپ وتىر.