وزبەكستان تۇركياعا كومەككە 60 قۇتقارۋشى جىبەرەدى

تاشكەنت. قازاقپارات - وزبەكستان تۇركياعا ەلدىڭ وڭتۇستىك-شىعىسىندا بولعان جويقىن جەر سىلكىنىسىنىڭ سالدارىن جويۋعا شۇعىل كومەك كورسەتەدى، دەپ حابارلايدى قازاقپارات ءتىلشىسى وزبەكستان پرەزيدەنتىنىڭ باسپا ءسوز قىزمەتىنە سىلتەمە جاساپ.

«پرەزيدەنت شاۆكات ميرزيەيەۆتىڭ تاپسىرماسى بويىنشا تۇركياعا جەر سىلكىنىسىنەن زارداپ شەككەندەرگە گۋمانيتارلىق كومەك جانە تابيعي اپات سالدارىن جويۋعا قاتىسۋ ءۇشىن توتەنشە جاعدايلار مينيسترلىگىنىڭ ءبىر توپ قۇتقارۋشىلارى جونەلتىلەدى»، - دەدى باسپا ءسوز حاتشىسى شەرزود اسادوۆ.

وزبەكستان ت ج م حابارلاعانداي، مەملەكەت باسشىسىنىڭ تاپسىرماسى بويىنشا گۋمانيتارلىق كومەك كورسەتۋ جانە جەر سىلكىنىسى سالدارىن جويۋ ءۇشىن ت ج م- ءنىڭ 60 قۇتقارۋشىسى مەن ارنايى قۇتقارۋ تەحنيكاسى 3 بىرلىگى تۇركياعا جونەلتىلىپ جاتىر.

ەسكە سالا كەتسەك، 6- اقپان كۇنى تاڭەرتەڭ تۇركيانىڭ وڭتۇستىك-شىعىسىندا ماگنيتۋداسى 7,4 كۇشتى جەر سىلكىنىسى بولدى. كوپتەگەن قيراۋلار سالدارىنان ادامدار ءۇيىندى استىندا قالدى، قۇتقارۋ جۇمىستارى جۇرگىزىلۋدە. جۇزدەگەن ادام قازا تاۋىپ، مىڭداعان ادام جاراقات الدى.