ەرلان قارين قازاق تەلەۆيزياسىنىڭ 60 جىلدىعىنا وراي ۇلتتىق ارنانىڭ جوسپارىمەن ءبولىستى
«بيىلعى ەڭ ۇلكەن ايتۋلى داتالاردىڭ ءبىرى - قازاق تەلەۆيزياسىنىڭ 60 جىلدىعى. ءبىز قازىر وسىعان بەلسەنە دايارلانۋدامىز. قازاق تەلەۆيزياسىنىڭ 60 جىلدىعى بيىل ناۋرىزدىڭ 16-دا اتالىپ وتەدى. ۇلكەن سالتاناتتى جيىن مەن ءبىرقاتار شارالار ۇيىمداستىرىلادى. ءبىز بۇل جۇمىستى بىرنەشە اي بۇرىن باستاپ كەتكەن ەدىك. اقپان ايىندا الماتىداعى ءال- فارابي اتىنداعى قازاق ۇلتتىق ۋنيۆەرسيتەتىندە ۇلكەن كونفەرەنسيا ءوتىپ، ءوزىمىزدىڭ اۋديتوريامىزدى اشتىق. بولاشاقتا وسىنداي اۋديتوريانى ل. گۋميليەۆ اتىنداعى ەۇۋ- دا اشۋدى جوسپارلاپ وتىرمىز»، - دەدى ەرلان قارين قازمەديادا وتكەن باسپا ءسوز ءماسليحاتىندا.
سونىمەن قاتار، ول جەكسەنبى سايىن التىن قوردا ساقتاۋلى، كەزىندە جۇرتتىڭ كوڭىلىنەن شىققان باعدارلامالاردىڭ كورسەتىلىپ جاتقانىن اتاپ ءوتتى.
«اقسەلەۋ سەيدىمبەكتىڭ، سۇلتان ورازاليننىڭ، ساعات اشىمبايەۆ قاتىسقان باعدارلامالار ەفيردەن بەرىلدى. بۇدان كەيىن دە تانىمال تۇلعالار جايلى باعدارلامالار كورسەتىلەتىن بولادى. سونداي- اق، الپىس جىلدىقتىڭ اياسىندا 12-16 - ناۋرىز ارالىعىندا ءبىزدىڭ ەفيردە قازىر كوپشىلىككە تانىمال باعدارلامالاردى جۇرگىزۋگە ءبىزدىڭ ارداگەر جۋرناليستەرىمىز شىعاتىن بولادى. ياعني، جاڭالىقتاردى، باسقا دا باعدارلامالاردى جۇرگىزۋگە كەزىندە ۇلتتىق ارنادا قىزمەت ەتكەن، قازاق تەلەۆيزياسىنىڭ دامۋىنا ۇلەسىن قوسقان ارداگەر جۋرناليستەر شىعادى. وسىلايشا، تەلەۆيزيا سالاسىنىڭ دامۋىنا ۇلەس قوسقان تۇلعالاردى تارتۋ ارقىلى ۇرپاقتار ساباقتاستىعىن جالعاعىمىز كەلەدى»، - دەدى ەرلان قارين.
«قازاقستان» ر ت ر ك» ا ق باسقارما ءتوراعاسى بۇعان قوسا ارنايى تەلەۆيزيالىق جوبالار مەن جاڭا پرەمەرالاردىڭ باستالۋى ناۋرىز مەرەكەسىنە ارنايى جوسپارلانىپ وتىرعانىن اتاپ ءوتتى.
«ۇلكەن جوبالارمەن، قىزىقتى باعدارلامالارمەن ناۋرىز مەرەكەسىندە قاۋىشاتىن بولاسىزدار»، - دەپ ءتۇيدى ەرلان قارين.
اۆتور: ايان بەكەن ۇلى