اقمولا وبلىسىنداعى ايەلدەردىڭ 60 پايىزى ورتا جانە شاعىن كاسىپكەرلىكپەن اينالىسادى
دوستىق ۇيىندە وتكەن جيىنعا باسقارما باسشىلارى، ۇكىمەتتىك ەمەس ۇيىمدار، ەتنومادەني بىرلەستىكتەر مەن ءبىلىم بەرۋ سالاسىنىڭ وكىلدەرى قاتىستى. ىسكەر ايەلدەردىڭ جەتىستىگىن كورسەتۋ ماقساتىندا ۇيىمداستىرىلعان شارادا وبلىس اكىمىنىڭ ورىنباسارى ءسوز سويلەپ، ايەلدەر قاۋىمىن ءتول مەرەكەلەرىمەن قۇتتىقتادى.
«قازىر قوعامدىق ءومىردىڭ كەز كەلگەن سالاسىن ايەلدەرسىز ەلەستەتۋ مۇمكىن ەمەس. نازىك جاندىلار قاي جەردە دە وتە بەلسەندى. جاۋاپتى، ءار ىسىنە تىڭعىلىقتى ازاماتشالارعا قانداي ءىستى بولماسىن سەنىپ تاپسىرۋعا بولادى. ولار - وتباسىنىڭ ۇيىتقىسى، ازاماتتىق ۇستانىمى ايقىن جاندار. ستاتيستيكالىق مالىمەتتەرگە جۇگىنسەك، وبلىسىمىزدا ورتا جانە شاعىن كاسىپكەرلىكتە ايەلدەردىڭ ۇلەسى 60 پايىزدى قۇرايدى ەكەن. بۇل ءوڭىرىمىزدىڭ الەۋمەتتىك-ەكونوميكالىق الەۋەتىن ارتتىرۋدا ايەلدەردىڭ ءرولىنىڭ زور ەكەندىگىن كورسەتەدى»، - دەدى نۇرلان جاڭبىرشى ۇلى.
بۇدان سوڭ اقمولا وبلىسى بويىنشا ىسكەر ايەلدەر قاۋىمداستىعىنىڭ ءتورايىمى دامەلى قويشينا ءسوز الىپ، وڭىرىمىزدەگى كاسىپكەر ايەلدەردىڭ جۇمىسى جايىندا اڭگىمەلەدى. سونداي-اق، كونفەرەنسيا بارىسىندا قازاقستان حالقى اقمولا اسسامبلەياسى ءتوراعاسىنىڭ ورىنباسارى، «توي داستارحان» سەرىكتەستىگىنىڭ باسشىسى ەلەنا ماشينسكايا، «سبەربانك» اكسيونەرلىك قوعامى فيليالىنىڭ ديرەكتورى اسەل ماحمۇتوۆا، «كوكشەتاۋ اۆتوبۋس پاركى» سەرىكتەستىگىنىڭ ديرەكتورى ءاسيا ءشارىموۆا، بۋراباي اۋدانىنداعى «مەرەي» سەرىكتەستىگىنىڭ باسشىسى گاۋحار حامزينا سياقتى ىسكەر ايەلدەر جەتىستىككە جەتۋدەگى تاجىريبەلەرى جونىندە وي ءبولىستى. ولاردىڭ ومىرىندە قيىندىقتار مەن كەدەرگىلەر كوپ بولسا دا، سونىڭ ءبارىن جەڭىپ، كاسىپتەرىن ورگە باستىرىپ وتىرعان ىسكەرلىكتەرى كوڭىل سۇيسىنتەدى.
ىسكەر ايەلدەردىڭ وبلىستىق كونفەرەنسياسى اقمولا وبلىسى اكىمىنىڭ جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى كوميسسيانىڭ وتىرىسىمەن جالعاستى. مۇندا كامەلەتتىك جاسقا تولماي جۇكتى بولۋ، ازاماتتاردىڭ ناشاقورلىققا سالىنۋى، جەتىم بالالاردى تاربيەلەۋ جانە وقىتۋ سياقتى وزەكتى ماسەلەلەر قارالدى. وبلىستىق دەنساۋلىق ساقتاۋ باسقارماسىنىڭ باسشىسى گۇلنار قۇلىشيەۆا بايانداما جاسادى. ونىڭ ايتۋىنشا، وتكەن جىلى جاسوسپىرىم قىزدار اراسىنداعى ەرتە جۇكتىلىك بويىنشا 84 وقيعا تىركەلىپتى. ال اعىمداعى جىلدىڭ باسىنان 22 وقيعا بەلگىلى بولىپ وتىر. بۇل - الاڭداتارلىق جاي. وسى رەتتە، سالا باسشىسى اتا-انالار مەن بالالاردىڭ قاتىسۋىمەن دوڭگەلەك ۇستەلدەر، سەمينارلار ۇيىمداستىرىپ، جاستار تاربيەسى جۇمىستارىن شيراتۋ قاجەتتىگىنە نازار اۋداردى. ادامزات بالاسىنىڭ دەنساۋلىعى مەن ەلىمىزدىڭ ۇلتتىق قاۋىپسىزدىگىنە ۇلكەن قاتەر توندىرەتىن ەسىرتكىنى قولدانعان 810 ازامات ەسەپتە تۇر. ونىڭ 56 سى ايەل ەكەن.
وبلىستىق ءبىلىم باسقارماسىنىڭ باسشىسى بالىم ءىزباساروۆا جەتىم بالالاردى تاربيەلەۋ جانە وقىتۋدىڭ تۇيتكىلدى ماسەلەلەرى جونىندە اڭگىمەلەدى. بۇگىندە وڭىرىمىزدە 2155 اتا-انانىڭ قامقورلىعىنسىز قالعان بالا بار. ولاردىڭ بولاشاقتا جوعارى وقۋ ورىندارىندا وقىپ، ءبىلىمىن جالعاستىرۋى ءۇشىن ارنايى 627 شوت اشىلعان. ايتا كەتەرلىگى، وتكەن جىلى «مەيىرىم، «وزىڭنەن باستا» اكسيالارى اياسىندا از قامتىلعان، جەتىم جانە مۇمكىندىگى شەكتەۋلى بالالارعا الەۋمەتتىك كومەكتەر كورسەتىلىپتى. وتىرىس سوڭىندا كوميسسيا حاتشىسى جانىبەك قاليەۆ اعىمداعى جىلدىڭ جوسپارلارىمەن تانىستىرىپ، ايەلدەر قاۋىمىن بەلسەندى بولۋعا شاقىردى.
جيىن قورىتىندىسىندا وبلىس اكىمىنىڭ ورىنباسارى نۇرلان نۇركەنوۆ قوعامدا وتباسى ءرولىنىڭ ارتۋىنا، جاستاردى پاتريوتيزم رۋحىندا تاربيەلەۋگە ۇلەس قوسقان ازاماتتارعا العىس حاتتار تابىس ەتتى.