ەل-نينو كليماتتىق قۇبىلىسى دەگەنىمىز - تىنىق مۇحيتتىڭ شىعىس اۋداندارىنداعى سۋ بەتىنىڭ ءبىرشاما جىلىنۋى، شامامەن فارەنگەيت بويىنشا 1-3 گرادۋس. مۇحيت سۋىنىڭ جىلىنۋى ءبىر جەرلەردە قۇرعاقشىلىققا اكەلىپ سوقتىرسا، ءبىر ايماقتاردا كەرىسىنشە تولاسسىز جاڭبىر جاۋدىرادى.
«ەل- نينو ەفيوپيادان گايتيگە دەيىن جانە پاپۋا-جاڭا گۆينەياعا قانداي زالال كەلتىرگەنىن كورىپ وتىرمىز. وسى قۇبىلىستىڭ دەنساۋلىق سالاسىنا كەرى سالدارى 2016-جىلى سەزىلەدى»، - دەپ مالىمدەدى د د س ۇ توتەنشە جاعدايلار جانە گۋمانيتارلىق شارالار ءىس-قيمىلى دەپارتامەنتىنىڭ ديرەكتورى ريچارد برەننان.
ب ۇ ۇ- نىڭ ەسەبى بويىنشا، ەل-نينو قۇبىلىسى شىعىس جانە وڭتۇستىك افريكا، تىنىق مۇحيت ارالدارى، وڭتۇستىك-شىعىس ازيا جانە ورتالىق امەريكادا قۇرعاقشىلىققا، سۋ تاسقىنىنا، تولاسسىز نوسەرگە اكەلىپ سوقتىرىپ، ينفەكتسيالىق اۋرۋلاردىڭ ورشۋىنە، سۋ جەتىسپەۋشىلىگىنە، دەنساۋلىق ساقتاۋ سالاسىنداعى قاتەرلەرگە ۇرىندىرادى.
ب ۇ ۇ- نىڭ كەلتىرگەن دەرەكتەرىندە، جىل سايىن وسى قۇبىلىستان دامۋشى ەلدەردەگى 60 ميلليون ادام زارداپ شەگەدى.
بۇگىنگى تاڭدا ەل-نينو قۇبىلىسىنان زارداپ شەككەن جەتى مەملەكەت حالىقارالىق قاۋىمداستىقتان قارجىلىق كومەك كورسەتۋىن سۇراپ وتىر. ماماندار ەفيوپيا، لەسوتو، كەنيا، پاپۋا-جاڭا گۆينەيا، سومالي، تانزانيا جانە ۋگانداداعى دەنساۋلىق ساقتاۋ سالاسىنا قولداۋ كورسەتۋگە 76 ميلليون قاجەت ەكەندىگىن ەسەپتەپ شىعارعان.