بۇلاندى اۋدانىنىڭ بايسۋات اۋىلىندا قولعا الىنعان قۇنى 32 ميلليارد تەڭگەگە باعالانىپ وتىرعان جوبا 2015 باستالىپ، 2019 - جىلى تولىقتاي جۇزەگە اسىرىلاتىن بولادى. كاسىپورىننىڭ قۋاتى جىلىنا تىرىدەي 60 مىڭ توننا برويلەر تاۋىقتارىن وندىرۋگە مۇمكىندىك بەرمەك. جوبا جۇزەگە اسىرىلعان كەزدە 700 جاڭا جۇمىس ورنى اشىلادى دەپ جوسپارلانعان.
ق ر اۋىل شارۋاشىلىعى مينيسترلىگى جانە اقمولا وبلىسى اكىمدىگى قولداۋ ءبىلدىرىپ وتىرعان بۇل جوبا ەكى كەزەڭ بويىنشا (2017 - جىلى - تىرىدەي 30 مىڭ توننا برويلەر، 2019 - جىلى - 60 مىڭ توننا برويلەر) جۇزەگە اسىرىلاتىن بولادى.
اتالعان قۇس فابريكاسىنىڭ العاشقى قازىعىن قاعۋ شاراسىنا قاتىسقان ق ر اۋىل شارۋاشىلىعى ءمينيسترىنىڭ ورىنباسارى ساپارحان وماروۆ پەن وبلىس اكىمى سەرگەي كۋلاگين جانە «ايتاس» كومپانيالار توبىنىڭ قۇرىلتايشىسى سەرىك تولىقپايەۆ اتالعان جوبانىڭ ماڭىزدىلىعىنا توقتالىپ، ەلىمىزدە اۋىل شارۋاشىلىعى سالاسىنىڭ دامۋىنا زور ۇلەس قوساتىنىن ەرەكشە اتاپ ءوتتى.
اۆتور: اسلان وسپانوۆ