مۇعالىمدەردەن ون كۇندە 600 دەن استام ءوتىنىش- ارىز ءتۇستى - مينيسترلىك
چات قۇرىلعان 10 كۇندە وعان 25 مىڭنان استام ادام قوسىلعان.
«وسى ۋاقىت ىشىندە مۇعالىمدەردەن 600-دەن استام سۇراق پەن ءوتىنىش ءتۇستى. سۇراقتاردىڭ باسىم بولىگى مۇعالىمدەر قۇقىعىنىڭ بۇزىلۋىنا قاتىستى. اتاپ ايتقاندا، ولاردى مىندەتىنەن تىس جۇمىستارعا تارتۋ، ارتىق ەسەپ تالاپ ەتۋ. سونداي- اق مۇعالىمدەردىڭ اتتەستاتسياسىنا، سانات بەرۋ، وقۋ جۇكتەمەسىن ءبولۋ جانە تاعى باسقاسىنا قاتىستى سۇراقتار ءتۇسىپ جاتىر»، - دەلىنگەن ۆەدومستۆو حابارلاماسىندا.
ءمالىم ەتىلگەندەي، Telegram-چاتقا تۇسكەن بارلىق اقپارات تەكسەرىلەدى.
«ماماندارىمىز جەدەل تۇردە كەرى بايلانىس جاساپ، مۇعالىمدەردىڭ ءاربىر وتىنىشىنە جاۋاپ بەرەدى جانە قاجەت بولعان جاعدايدا ءتيىستى شارا قابىلدايدى. مۇعالىمدەردىڭ سۇراقتارى مەن وتىنىشتەرىنە دەر كەزىندە جاۋاپ بەرۋ ءۇشىن ارنايى جۇمىس توبى قۇرىلعانىن اتاپ وتكىم كەلەدى. ونىڭ قۇرامىنا كوميتەتتىڭ، ءبىلىم سالاسىندا ساپانى قامتاماسىز ەتۋ اۋماقتىق دەپارتامەنتتەرىنىڭ جانە وبلىستىق ءبىلىم باسقارمالارىنىڭ وكىلدەرى بار. Telegram-چات مۇعالىمدەر قۇقىعىن بۇزۋ فاكتىلەرىن بارىنشا ازايتۋعا كومەكتەسەتىنىنە سەنەمىز»، - دەدى وقۋ- اعارتۋ مينيسترلىگى ءبىلىم سالاسىندا ساپانى قامتاماسىز ەتۋ كوميتەتىنىڭ ءتوراعاسى ەرنۇر داۋەنوۆ.
كوميتەت چاتتى جاقسارتۋ جانە ودان ءارى جەتىلدىرۋ بويىنشا جۇمىس ىستەپ جاتىر. مۇعالىمدەردىڭ سۇراقتارىنا جاۋاپ بەرۋدەن باسقا، چاتتا مۇعالىمدەر ءۇشىن پايدالى اقپارات جاريالانادى. مىسالى، جالاقى كالكۋلياتورى، مۇعالىمدەردىڭ قىزمەتىنە بايلانىستى زاڭدار مەن نورماتيۆتەر، ءجيى كەزدەسەتىن جاعدايلاردى شەشۋ جاعدايلارىنىڭ مىسالدارى.
«پەداگوگتى قورعاۋ» Telegram -چاتى ىسكە قوسىلاتىنى تۋرالى بۇعان دەيىن جازعان بولاتىنبىز.