ەڭبەك جانجالدارىنىڭ كۇشەيۋىنە بايلانىستى ماڭعىستاۋ وبلىسىنىڭ پروكۋراتۋراسى وبلىستاعى ءبىرقاتار كاسىپورىنداردىڭ قىزمەتىنە تەكسەرۋ جۇرگىزگەن.
6 كاسىپورىندا ورتكە قارسى، ونەركاسىپتىك، سانيتارلىق- ەپيدەميولوگيالىق قاۋىپسىزدىك جانە باسقا دا زاڭنامالار بويىنشا 587-دەن استام كەمشىلىك انىقتالعان.
تەكسەرىس بارىسىندا 412 قىزمەتكەرگە 34,4 ميلليون تەڭگە وتەماقى تولەندى.
ءبىرقاتار جۇمىس بەرۋشىلەر اكىمشىلىك جاۋاپكەرشىلىككە تارتىلدى.
ماسەلەن، ءبىر كاسىپورىننىڭ 137 قىزمەتكەرى ىستىق تاماقپەن قامتاماسىز ەتىلمەسە، 5 كاسىپورىندا 637 بوس جۇمىس ورنىنىڭ بارىن جاسىرعان، 63 قىزمەتكەردىڭ جۇمىس ۋاقىتى اسىرا ورىندالعان.
پروكۋرور اكتىلەرى بويىنشا 541 قىزمەتكەرگە ۇستەمە جۇمىس ىستەگەنى ءۇشىن العاش رەت 63 ميلليون تەڭگە كولەمىندە ۇستەمەاقى بەرىلدى.
سونداي- اق پروكۋرورلار ايماقتاعى كاسىپورىنداردىڭ بىرىندەگى جۇمىسشىلاردىڭ 51 بالاسىن شۋچينسك قالاسىنداعى «بالداۋرەن» لاگەرىنە (العاش رەت جۇمىس بەرۋشىنىڭ ەسەبىنەن) جىبەرۋگە ىقپال ەتتى.
جالپى، تەكسەرۋ ناتيجەسى بويىنشا 39 قاداعالاۋ اكتىسى ەنگىزىلىپ، ازاماتتاردىڭ قۇقىعىنا اسەر ەتەتىن باسقا دا فاكتورلارعا تالداۋ جۇرگىزىلىپ جاتىر.
2022 -جىلعى 20- قازاندا وبلىس پروكۋرورىنىڭ توراعالىعىمەن وبلىس اكىمى مەن باسقا دا مەملەكەتتىك ورگاندار مەن ءىرى مۇناي- گاز كومپانيالارى باسشىلارىنىڭ قاتىسۋىمەن وتكەن كەڭەيتىلگەن القا ماجىلىسىندە وسى جانە وزگە دە فاكتىلەر تالقىلاندى.
- انىقتالعان زاڭبۇزۋشىلىقتار كاسىپورىن باسشىلارىنىڭ جۇمىسشىلاردىڭ قۇقىقتارىن بارىنشا ساقتاۋ قاجەتتىگىن مۇلدە دۇرىس تۇسىنبەگەنىن كورسەتەدى، - دەپ اتاپ ءوتتى وبلىس پروكۋرورى رۋفات قۇتتىقوۆ. - ءبىز الداعى ۋاقىتتا دا جۇمىسشىلاردىڭ قۇقىقتارىن مۇلتىكسىز ساقتاۋدى تالاپ ەتىپ، كاسىپورىن باسشىلارىنىڭ مىندەتتەمەلەردى ورىنداۋىن قاداعالايتىن بولامىز.
lotoclub.kz
رەداكتور
جانات قاپالبايەۆا