قازاقستاندىقتار 600 ءبىلىم بەرۋ پلاتفورماسىن تەگىن پايدالانا الادى
بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ءبىرىنشى ۆيتسە-ءمينيسترى باعدات مۋسين ايتىپ بەردى، دەپ حابارلايدى قازاقپارات ءتىلشىسى.
«ءبىلىم بەرۋ پلاتفورمالارى ءۇشىن سەرۆەرلەردى قازاقستانعا اكەلىپ قانا قويماي، ولاردى رەسپۋبليكالىق ينتەرنەت جەلىسىنە جۇكتەمە از بولاتىنداي ەتىپ ورنالاستىردىق. ياعني، ءبىز سەرۆەرلەردى لوكاليزاتسيالادىق. تانىمال وتاندىق Bilimland پلاتفورماسى بار. ونىمەن كوپتەگەن اكىمدىكتەر كەلىسىم جاسايدى، سوندىقتان ءبىز ترافيكتى تەك جاقىن دەرەكتەر ورتالىعىنا جەتكىزۋ ءۇشىن ونىڭ سەرۆەرلەرىن 10 data-ورتالىققا ورنالاستىردىق. بۇرىن بارلىعى الماتى ارقىلى وتەتىن جانە بۇل ترافيكتى ۇيىمداستىرۋدا، رەسۋرستىڭ قولجەتىمدى ەتۋدە قيىندىق تۋدىراتىن»، - دەدى باعدات مۋسين «جاڭا وقۋ جىلى - جاڭا مۇمكىندىكتەر» تاقىرىبىنداعى ونلاين كونفەرەنتسيادا.
مينيسترلىك وسى ءبىلىم بەرۋ پلاتفورمالارىنا دۇرىس باعىتتاۋ جانە باپتاۋ تۇرعىسىنان كومەكتەسكەن.
سونىمەن بىرگە، وتكەن وقۋ جىلىنىڭ ءتورتىنشى توقسانىندا 380 ينتەرنەت-رەسۋرس بولعان، وپەراتورلار ولاردى تەگىن پايدالانۋعا بەرگەن.
«بۇل جولى ب ع م ۇسىنىسىمەن بالالاردىڭ دامۋىنا اسەر ەتەتىن 600 ءبىلىم بەرۋ پلاتفورماسى مەن الاڭىنا كىرۋدى تەگىن ەتتىك. ياعني، وسى 600 سايتتىڭ كەز كەلگەنىن اشساڭىز، SIM كارتاڭىزداعى كەز كەلگەن تاريفتىك جوسپارىڭىز جۇمسالمايدى»، - دەپ ءتۇسىندىردى ب. مۋسين.