ەلورداداعى جارمەڭكە: قاراعاندى وبلىسىنان 600 توننادان استام ءونىم اكەلىندى

نۇر- سۇلتان. قازاقپارات - ەلوردادا قاراعاندى وبلىسىنىڭ اۋىل شارۋاشىلعى ونىمدەرىنىڭ جارمەڭكەسى ءوتىپ جاتىر، دەپ حابارلايدى قازاقپارات ءتىلشىسى.

«بۇگىنگى جارمەڭكەگە قاراعاندىلىق تاۋار وندىرۋشىلەر 600 توننادان استام اۋىل شارۋاشىلىعى ونىمدەرىن جەتكىزدى. ياعني 80 نەن استام تاۋار وندىرۋشىلەر ءوز ونىمدەرىن ۇسىنىپ وتىر. اتاپ ايتقاندا، 100 توننادان استام ەت جانە ەت ونىمدەرى، 360 توننادان استام كارتوپ، 360 مىڭ دانا جۇمىرتقا، 15 توننا ءسۇت جانە ءسۇت ونىمدەرى، 5 توننا بالىق جانە تاعى باسقا تاۋارلار ۇسىنىلۋدا» ، - دەدى قاراعاندى وبلىسى اۋىل شارۋاشىلىق باسقارماسى باسشىسىنىڭ ورىنباسارى سىرىم بوشپانوۆ.

ونىڭ ايتۋىنشا، جارمەڭكەگە اتالعان ءوڭىردىڭ 4 قالاسى مەن 9 اۋدانىنىڭ تاۋار وندىرۋشىلەرى قاتىسىپ جاتىر.

«جارمەڭكەگە قويىلعان تاۋارلاردىڭ باعاسى ەلوردا نارىعىنان 10-15 پايىزعا ارزان. جارمەڭكەگە حالىق تاڭەرتەڭنەن اعىلۋدا، استانالىقتار اراسىندا اسىرەسە ءبىزدىڭ ەتكە سۇرانىس جوعارى. سونداي- اق، جارمەڭكە اياسىندا «باۋىرساق جانە قىمىز» فەستيۆالى ۇيىمداستىرىلىپ، حالىققا تەگىن تاراتىلاتىن بولادى» ، - دەدى ول.

ودان بولەك، ەلوردالىقتارعا جارمەڭكە الاڭىندا كونسەرتتىك باعدارلاما ۇسىنىلۋدا. «حان- شاتىر» ويىن- ساۋىق ورتالىعىنىڭ الاڭىندا ءوتىپ جاتقان جارمەڭكە 2 كۇنگە سوزىلادى.