بۇل تۋرالى بۇگىن سەناتتىڭ جالپى وتىرىسىندا ق ر اقپارات جانە كوممۋنيكاتسيالار ءمينيسترى داۋرەن ابايەۆ ءمالىم ەتتى، دەپ حابارلايدى قازاقپارات.
ايتا كەتەيىك، بۇگىنگى جالپى وتىرىستا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اقپارات جانە كوممۋنيكاتسيالار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكى وقىلىمدا قاراپ، قابىلدادى.
وسى زاڭناما اياسىندا «سۇر تارەلكەلەردى» تاراتۋدى قۇقىقتىق رەتتەۋگە ەنگىزۋ قاراستىرىلعان.
«بۇگىندە 600 مىڭعا تارتا وتباسى «سۇر تارەلكەلەردى» پايدالانىپ كەلەدى. بۇل ءوز كەزەگىندە 600 مىڭ وتباسى قازاقستاندىق تەلەارنالاردى قارامايدى ءارى قازاقستاننىڭ اقپاراتتىق كەڭىستىگىنەن تىس قالىپ وتىرعانىن بىلدىرەدى. ياعني سپۋتنيكتىك تارەلكەلەر قويىلىپ، تولەم QIWI- ءاميان ارقىلى جاسالادى، سونىمەن قاتار تولەمدەر وففشورلىق كومپانيالار ارقىلى دا ىسكە اسىرىلۋى مۇمكىن. ولار قۇقىقتىق كەڭىستىكتەن تىس. بۇل زاڭ جوباسىندا ءبىز «سۇر تارەلكەلەردى» تاراتۋشىلاردى قۇقىقتىق كەڭىستىككە كىرگىزىپ جاتىرمىز. وكىنىشكە قاراي، وسىعان دەيىن اتالعان قۇرىلعىلاردى رەتتەيتىن ەشقانداي نورما بولمادى.
«سۇر تارەلكەلەردى» ورناتقان ازاماتتارعا ەشقانداي اكىمشىلىك ىقپال ەتۋ شارالارى قولدانىلمايدى. بۇنداي شارالار بۇل قۇرىلعىلاردى تاراتاتىندارعا قاتىستى بولادى. وسى ورايدا ءبىز ولاردى قۇقىقتىق كەڭىستىككە شىعارامىز»، - دەپ ءتۇسىندىردى مينيستر.