قازاقستان اسكەري جوعارى وقۋ ورىندارىنىڭ 600 دەن استام كۋرسانتى اسكەري انت قابىلدادى - فوتو

استانا. قازاقپارات - الماتى جانە اقتوبەدەگى ق ر قورعانىس مينيسترلىگىنىڭ اسكەري جوعارى ورىندارىندا جاس تولىقتىرۋدى اسكەري انتقا كەلتىرۋ سالتاناتتى ءراسىمى ءوتتى، دەپ حابارلادى ۆەدومستۆونىڭ باسپا ءسوز قىزمەتىنەن.

وزدەرىنىڭ تۋما-تۋىسقاندارى، كومانديرلەرى مەن كۋرستاستارى، سونداي-اق ۇلى وتان سوعىسى مەن ق ر قارۋلى كۇشتەرى ارداگەرلەرىنىڭ الدىندا 603 كۋرسانت سەرت بەردى. ونىڭ 340 ى قۇرلىق اسكەرى اسكەري ينستيتۋتى تىڭداۋشىلارىنىڭ قاتارىن تولىقتىردى. جوعارى وقۋ ورنى ءۇشىن بۇل الدىڭعى جىلدار ىشىندەگى ەڭ ۇلكەن ىرىكتەۋ بولدى. 156 بوزبالا بيىلعى جىلى راديوەلەكترونيكا جانە بايلانىس اسكەري-ينجەنەرلىك ينستيتۋتىنا وقۋعا ءتۇستى. تاعى 107 ادام كەڭەس وداعىنىڭ ەكى مارتە باتىرى تالعات بيگەلدينوۆ اتىنداعى اۋە قورعانىسى كۇشتەرى اسكەري ينستيۋتىنىڭ كۋرسانتتارى اتاندى.

2014-2015 وقۋ جىلىندا راديوەلەكترونيكا جانە بايلانىس اسكەري-ينجەنەرلىك ينستيتۋتىن 207 ادام ءتامامداعانىن ايتا كەتكەن ءجون. 4 ءۋى بىلىمىمەن التىن مەدالعا يە بولدى، 13 تۇلەك ۇزدىك ديپلوم الدى. قۇرلىق اسكەرلەرىنىڭ اسكەري ينستيتۋتى 368 وفيتسەردى شىعاردى، ولاردىڭ ىشىندە 18 كۋرسانت قىرعىز رەسپۋبليكاسى جانە 8 كۋرسانت تاجىكستان رەسپۋبليكاسىنان. ال اۋە قورعانىسى كۇشتەرى اسكەري ينستيتۋتىنىڭ تۇلەكتەرى وسى جىلدىڭ كۇزىندە جوعارى وقۋ ورنىن اياقتايدى.