الماتىعا كەلگەن ساياحاتشىلار سانى 600 مىڭعا جەتتى- فوتو
بۇل ەلىمىزدەگى تۋريزمنىڭ ىلگەرى باسىپ كەلە جاتقانىن بايقاتسا كەرەك. تەك الماتى قالاسىنىڭ تۋريزمىنەن مەملەكەتتىك قازىناعا 5 ميلليارد تەڭگەدەن استام قارجى تۇسكەن. مىڭجىلدىقتىڭ باسىندا الماتىعا كەلگەن ساياحاتشىلار 200 مىڭنان اسپاعان. ال قازىر 600 مىڭعا جەتكەن. اسىرەسە 2011 - جىلى وتكەن ازيادا قىسقى تۋريزمنىڭ تيىمدىلىگىن ايقىنداپ بەردى.
كۇردەلى جوندەۋدەن وتكەن «مەدەۋ» مۇزايدىنى مەن شىمبۇلاق تاۋ- شاڭعى كۋرورتى جۇمىس كۇنى دە كەلۋشىلەرگە تولى. ءتىپتى شىمبۇلاقتا وتكەن جىلى 1 كۇننىڭ ىشىندە 7 مىڭ ادام دەمالىپتى. ال بۇل كۇندەرى الاتاۋدىڭ بوكتەرىندە ورنالاسقان شىمبۇلاقتىڭ سىيلى قوناعى - بەلگىلى ساياحاتشى، پوليارلىق گيد نورۆەگيالىق ينحە سولحەيم. ينحە سولحەيم، ساياحاتشى:
- بۇل مەنىڭ الماتىعا ءۇشىنشى رەت كەلۋىم. ماعان جاقسى اسەر قالدىرعان سوڭ، شىمبۇلاققا دوسىم گەنري حانزادانى جۇبايىمەن رومانتيكالىق دەمالىس وتكىزۋگە شاقىرعان ەدىم. ولارعا دا بۇل جەردىڭ كەرەمەت تابيعاتى ۇناپ، العىستارىن ايتىپ كەتتى. مۇندا قىزمەت كورسەتۋ دەڭگەيى وتە جوعارى. جانە سىزدەر ءاربىر كەلۋشىگە ءوز داستۇرلەرىڭىزدى تانىتىپ، قوناقجايلىلىق كورسەتەسىزدەر. تۋريزمدى دامىتۋدىڭ العى شارتى دا وسى.
نورۆەگيالىق قوناق سونداي- اق الماتىداعى ترامپليندى ءسوز ەتتى. وسلودا وتكەن وليمپيادادان كەيىن، ونداعى ترامپلين جىل 12 اي بويى ءتۇرلى سپورتتىق شارالار ۇيىمداستىراتىن ورتالىققا اينالىپ، تابىس اكەلىپ جاتقاندىعىن العا تارتتى. ال قازاقستاندىقتاردىڭ كوزدەپ وتىرعان جاڭا جوباسى - «كوكجايلاۋ» تاۋ- شاڭعى ورتالىعى. جاڭا جىلدان قۇرىلىس باستالاتىن بۇل دەمالىس ورنى ماۋسىمىنا 1 ميلليون ادام قابىلداماق.
لۋكاس مارشانت، «كوكجايلاۋ» تاۋ- شاڭعى كۋرورتىنىڭ جوبا مەنەدجەرى:
- ءۇش- ءتورت جىلدا قولدانىسقا بەرىلەتىن «كوكجايلاۋدا 10 مىڭ ادام دەمالاتىن بولادى. باعاسىن دا قولجەتىمدى ەتەمىز. باستى ماقسات - الماتىنىڭ تاۋلارىن الەمگە تانىتىپ، تارتىمدى دەمالىس ورنىن قالىپتاستىرۋ. قازاقستاندا تۋريزمدى دامىتۋعا بارلىق نەگىز بار دەيدى شەتەلدەن كەلگەن قوناقتار. تەك بىزگە ماركەتينگ جەتىسپەيتىندىگىن تىلگە تيەك ەتتى ولار. ياعني ءالى دە ءوزىمىزدى جارنامالاي ءتۇسۋىمىز كەرەك.
ال شىمبۇلاقتا دەمالىپ جۇرگەن قوناقتار دەمالىس ورنىنىڭ قازىرگى جاعدايىنىڭ وزىنە جوعارعى باعا بەرىپ وتىر.
نادەجدا ستەپانوۆا، مۋرمانسك قالاسىنىڭ تۇرعىنى:
- مۋرمانسكىدە دە وسىنداي تاۋ- شاڭعى كۋرورتى بار. ءبىراق سىزدەردىكىمەن سالىستىرۋعا كەلمەيدى. مۇنداعى تابيعات، تاۋ، اۋا وتە كەرەمەت. الماتىعا قايتا كەلەرىم ءسوزسىز.
ادەتتە شەتەلدىكتەر الماتىعا ىسكەرلىك جانە مادەني شارالارمەن، ياعني مەيسي- تۋريزم باعىتىمەن ءجيى كەلەتىن بولسا، بۇگىندە ەكولوگيالىق تۋريزمگە دە قىزىعۋشىلىق ارتقان. قالا ماڭىنداعى التىن ەمەل، ىلە الاتاۋى، كولساي، شارىن سياقتى ۇلتتىق پاركتى ارالايتىندار دا ەل بيۋدجەتىنە قوماقتى قارجى ءتۇسىرىپ وتىر.
جانار الشىمبايەۆا، الماتى قالاسى تۋريزم باسقارماسىنىڭ ءتۋريزمدى دامىتۋ ءبولىمىنىڭ جەتەكشىسى:
- قازىرگى تاڭدا كوپتەگەن مەملەكەت تۋريزم ارقىلى ءوزىنىڭ ەكونوميكاسىن دامىتىپ وتىر. الماتى قالاسىندا تۋريستتىك سالادان 2013 - جىلى 5,2 ميلليارد تەڭگە كولەمىندە سالىق ءتۇسىمى بولدى. ەندىگى مىندەت - وتاندىق يميدجدى قالىپتاستىرىپ، ينفروقۇرىلىمدى دامىتۋ.