قىزىلوردا وبلىسى بويىنشا ەكولوگيا دەپارتامەنتىنىڭ باسشىسى مارات قۇرمانبايەۆ وسىلاي ءمالىم ەتتى، دەپ حابارلايدى قازاقپارات ءتىلشىسى.
ونىڭ ايتۋىنشا، وسىدان توعىز جىلداي بۇرىن قىزىلوردا وبلىسىندا تىركەلگەن 89901 كولىكتەن شىققان لاستاعىش زاتتار كولەمى 82,090 مىڭ توننانى قۇراعان ەكەن. ال 2017 -جىلى تىركەلگەن كولىكتەر ءبىرشاما ارتىپ، ولاردىڭ سانى 143750 دى قۇراعانىمەن لاستاعىش زاتتار كولەمى تومەندەگەن. دالىرەك ايتقاندا، ول 61,16 مىڭ تونناعا ازايعان.
«بۇل قورشاعان ورتاعا قاۋىپسىز وتىن ءتۇرى بولىپ تابىلاتىن گاز وتىنىنا اۋىسقان اۆتوكولىكتەردىڭ سانىنىڭ ارتۋىنا بايلانىستى بولىپ وتىر. وسى رەتتە گازبەن جۇرەتىن اۆتوكولىكتەر سانى 2015 -جىلى - 2725 بولسا، 2017 -جىلى - 9309 دانانى قۇرادى. ياعني ول 6 584 داناعا كوبەيدى»، - دەدى م. قۇرمانبايەۆ.
ەكولوگيالىق جاعدايدى جاقسارتۋ جانە ەكونوميكالىق تيىمدىلىكتى ارتتىرۋ ماقساتىندا وبلىس بويىنشا 1645 قوعامدىق كولىكتىڭ 663 داناسى گاز وتىنىنا كوشىرىلگەن. سونىمەن قاتار، وبلىس بويىنشا بۇگىنگى كۇندە گاز قۇيۋ بەكەتىنىڭ سانى 63 كە جەتتى.
ءادىلجان ۇمبەت