اقتاۋدا وتكەن پاۆلودار مۋزەيىنىڭ كورمەسىندە 6,5 ميلليون جىلعى ەكسپوناتتار تانىستىرىلدى

اقتاۋ. قازاقپاراتا - ماڭعىستاۋدا پاۆلودار وبلىسىنىڭ مادەنيەت كۇندەرى باستالىپ كەتتى.

3-4 -ماۋسىم كۇنىنە جوسپارلانعان شارانىڭ باستى ماقساتى ەكى ايماق اراسىندا بايلانىستى ورناتۋ بولىپ تابىلادى.

3 -ماۋسىم كۇنى ن. ءجانتورين اتىنداعى مۋزىكالىق-دراما تەاترىنىڭ ساحناسىندا ماڭعىستاۋلىقتار ءۇشىن ج. ايماۋىتوۆ اتىنداعى پاۆلودار وبلىستىق قازاق مۋزىكالىق- دراما تەاترىنىڭ «حانۋما» مۋزىكالىق كومەدياسى كورسەتىلدى.

سونداي-اق گ. پوتانين اتىنداعى پاۆلودار وبلىستىق تاريحي-ولكەتانۋ مۋزەيىنىڭ كورمەسى اشىلدى. بۇل جەردە ەرتىس ءوڭىرىنىڭ تاريحىمەن، الەۋمەتتىك جانە ەكونوميكالىق دامۋىمەن بايلانىستى ءتۇرلى جادىگەرلەر قويىلدى.

«مۋزەي ءوز جۇمىسىن 1942 -جىلى باستاعان، ول قازاقستانداعى ۇزدىك مۋزەيلەردىڭ قاتارىندا. بۇل جەردە اتاقتى اكتەر، رەجيسسەر شاكەن ايمانوۆتىڭ ساحنالىق كوستيۋمدەرى، حالىق ءانشىسى مايرا شامسۋتدينوۆانىڭ كيىمدەرى مەن سىرنايى، ارحەولوگ-عالىم الكەي مارعۇلاننىڭ زاتتارى قويىلعان. سونداي-اق عالىم قانىش ساتپايەۆتىڭ، باسقا دا پاۆلودارلىق اتاقتى ازاماتتارعا قاتىستى ءتۇرلى سۋرەتتەر مەن ماتەريالادارمەن تانىسۋعا بولادى»، - دەدى پوتانين اتىنداعى مۋزەيدىڭ ديرەكتورى گۇلنار نۇراحمەتوۆا.

مۋزەيگە قويىلعان ءتۇرلى كونە ەكسپوناتتارعا نازار اۋدارماي قويمايسىز، ولار بۇعىنىڭ سۇيەكتەرى (10-15 مىڭ جىل بۇرىنعى)، بيزوننىڭ ءمۇيىزى (8-10 مىڭ جىل بۇرىنعى)، مامونتتىڭ تىستەرى مەن گيپپاريوننىڭ (ءۇش تۇياقتى كونە جىلقى ءتۇرى) اياق-قولدارى. گيپپاريوننىڭ اياق-قولدارىنا 6,5 ميلليون جىل بولعان. كورمەدە سونىمەن بىرگە 250 ميلليون جىل بۇرىنعى تاسقا اينالعان موليۋسكالار: اممونيت پەن بەلەمنيتتەر تانىستىرىلدى. بەلگىلى بولعانداي، پاۆلودار مۋزەيىنىڭ پالەونتولوگيالىق كوللەكتسياسى «قازقوناق» ەسكەرتكىشتەرىنەن باستاۋ الادى. بۇل پالەونتولوگيالىق ەسكەرتكىشتى 1928 -جىلى رەسەي عالىمى يۋري ورلوۆ اشقان ەكەن.