قازالىدا جاس ءوسپىرىمدى ۇرىپ-سوققان 5 وقۋشىعا سوت ۇكىمى شىقتى
بيىلعى ءساۋىر ايىندا 5 وقۋشى 15 جاستاعى جاس ءوسپىرىمدى ۇرىپ-سوعىپ، سالدارىنان ول جەدەل جاردەم بريگاداسىمەن اۋرۋحاناعا جەتكىزىلگەن بولاتىن. بۇزاقىلار ۇستالىپ، اۋداندىق پوليتسيا بولىمىنە جەتكىزىلدى.
قىلمىستىق ءىس قىزىلوردا وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىندا قارالدى. كۇدىكتىلەرگە قىلمىستىق كودەكستىڭ 293-بابى 2-بولىگىنىڭ 1-تارماعى، 107-بابىنىڭ 2-بولىگى 5 جانە 8-تارماقتارى بويىنشا ايىپ تاعىلدى.
سوتتا انىقتالعانداي، ايىپتالۋشىلار بيىلعى 6- ساۋىردە، ساعات 14.00 شاماسىندا ساياباقتا جابىرلەنۋشى س. -مەن سوزگە كەلىپ قالعان. ونى قورشاپ الىپ، اياق تۇسىنان تەۋىپ قۇلاتقان. بەت تۇسىنان ءتورت مارتە جۇدىرىقپەن ۇرىپ، كەۋدە جانە باس تۇسىنان 2 رەت تەپكەن. دەنساۋلىعىنا ورتاشا دارەجەدە قاساقانا زيان كەلتىرىپ، وقيعا ورنىنان بوي تاسالاعان.
باستى سوت تالقىلاۋىندا ايىپتالۋشىلاردىڭ ەكەۋى ءوز كىناسىن مويىنداسا، بىرەۋى مويىنداعان جوق.
كوميسسيالىق ساراپشىلار جاساعان قورىتىندىعا سايكەس، ەكى كوزىنىڭ اينالاسى مەن سول جاق سامايىنا جاراقاتتىڭ كەلتىرىلۋى، كەۋدەسىنىڭ ءىسىنىپ كەتۋى جانە جابىق باس-مي جاراقاتىن الۋى سالدارىنان جاس ءوسپىرىمنىڭ دەنساۋلىعىنا «جەڭىل» دارەجەدە زيان تيگەن. بەتىنىڭ سول جاق تۇسىنىڭ جاراقاتى، قابىرعاسىنىڭ سىنۋى، 1-مويىن ومىرتقاسىنىڭ سىرتقى جاراقاتتارى دەنساۋلىعىنا «ورتا» دارەجەدە زيان كەلتىرگەن. ال دەنەسىندەگى سىرتقى جاراقاتتار ومىرىنە قاۋىپتى ەمەس دەپ ۇيعارىلعان.
تەرگەۋ جۇرگىزۋ بارىسىندا جانە سوتتا جابىرلەنۋشىنىڭ وكىلى قانداي دا ءبىر زياننىڭ ورنىن تولتىرۋ جونىندە وتىنىشپەن جۇگىنبەگەن.
پروكۋرور ايىپتالۋشىلارعا 1 جىلعا باس بوستاندىعىنان شەكتەۋ جازاسىن تاعايىنداۋدى سۇرادى.
«قىلمىستىق كودەكستىڭ 11-بابىنىڭ 3-بولىگىنە سايكەس، ايىپتالۋشىلار جاساعان قىلمىستىق قۇقىق بۇزۋشىلىق اۋىرلىعى ورتاشا قىلمىستار ساناتىنا جاتادى. ال قىلمىستىق كودەكستىڭ 81-بابىنىڭ 7-بولىگىنە ساي، ونشا اۋىر ەمەس قىلمىس نەمەسە قازاعا ۇشىراتۋمەن بايلانىستى ەمەس اۋىرلىعى ورتاشا قىلمىس جاساعان كامەلەتكە تولماعاندارعا باس بوستاندىعىنان ايىرۋ جازاسى تاعايىندالمايدى.
سوت ۇكىمىمەن كامەلەتكە تولماعان ءۇش ايىپتالۋشى كىنالى دەپ تانىلدى.
قىلمىستىق قۇقىق بۇزۋشىلىقتار جيىنتىعى بويىنشا تۇپكىلىكتى 1 جىلعا باس بوستاندىقتارىنان شەكتەۋ جازاسى تاعايىندالدى. سوت ۇكىمى زاڭدى كۇشىنە ەنگەن جوق»، - دەپ ءمالىم ەتتى قىزىلوردا وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنان.