ميدىڭ قارتايۋى: ونى باياۋلاتۋدىڭ قاراپايىم 5 جولى
مي قارتايسا، ەستە ساقتاۋ مەن كوگنيتيۆتى قابىلەتتەر ناشارلايدى. سوندىقتان ونىڭ الدىن الۋ جولدارىن بىلە ءجۇرىڭىز.
1. وقۋدى توقتاتپاڭىز
مي ءۇشىن ەڭ جاقسى بەلسەندىلىك - ول ءبىلىم الۋ. جاڭا اقپارات مەڭگەرۋ جانە جاڭا داعدى ۇيرەنۋ كەزىندە ميدا جاڭا نەيروندىق بايلانىستار تۇزىلە باستايدى: ول جاقسى ەستە ساقتاۋ قابىلەتى ءۇشىن ماڭىزدى. كوپشىلىك قارت كىسىلەر «بىزگە ەندى وقۋدىڭ نە قاجەتى بار» دەپ ويلايدى، سونىڭ سالدارىنان ولاردىڭ ميى ءجيى ەرتە قارتايادى.
ميدى جاتتىقتىرۋ ءۇشىن كەز كەلگەن نارسەنى وقۋعا نەمەسە ۇيرەنۋگە بولادى. مىسالى، شەت ءتىلىن وقۋ نەمەسە تىگىپ ۇيرەنۋ. باستىسى، ميعا جاڭا اقپارات ۇزدىكسىز كەلىپ تۇرۋى كەرەك. شىعارماشىلىق داعدىلاردى مەڭگەرۋ دە ەستە ساقتاۋدى جاقسارتۋعا كومەكتەسەدى. مىسالى، جاڭا بي ءتۇرىن مەڭگەرگىڭىز كەلەتىن شىعار؟ ! سولايشا جاعىمدى نارسەنى پايدالىمەن ۇيلەستىرە الاسىز.
2. دۇرىس تاماقتانىڭىز
كوكونىستەرگە، جەمىستەرگە، ءداندى داقىلدارعا جانە بۇرشاق داقىلدارىنا باي ديەتا ميدى ساۋ ۇستاۋعا كومەكتەسەدى. بالىق، جاڭعاقتار، زىعىر داندەرىن نەمەسە ومەگا-3 ماي قىشقىلدارىنىڭ باسقا كوزدەرىن جەۋ دە ونىڭ جۇمىسىن جاقسارتۋعا كومەكتەسەدى. ءبىراق قانداعى قانتتىڭ جوعارى دەڭگەيى قانت ديابەتىن نەمەسە دەمەنتسيانىڭ دامۋ ءقاۋپىن ارتتىرۋى مۇمكىن. سوندىقتان ءتاتتى گازدالعان سۋسىنداردى جانە ءتاتتى سياقتى قانتتى تاعامداردى ازايتىڭىز. الكوگولدەن باس تارتىڭىز، سەبەبى ول ەستە ساقتاۋ مەن ويلاۋ قابىلەتىنە جاعىمسىز اسەر ەتەدى.
3. ۇيقىنى قاندىرىڭىز
مي دۇرىس جۇمىس جاساۋى ءۇشىن تاۋلىگىنە 7-9 ساعات ۇيىقتاۋ ماڭىزدى.
4. كۇيزەلىستى ازايتىڭىز
كۇيزەلىس دەڭگەيىن تومەندەتۋ ەستە ساقتاۋ قابىلەتىن جاقسارتادى. قىسقا مەرزىمدى ەستەلىكتەردى ۇزاق مەرزىمدى ەستەلىكتەرگە اينالدىرۋعا جاۋاپ بەرەتىن مي بولىمىندە سترەسس گورمونى كورتيزولمەن بايلانىساتىن كوپتەگەن رەتسەپتورلار بار. بۇل جاعدايدا ەستە ساقتاۋ پروتسەستەرى بۇزىلىپ، ەموتسيونالدى سالا زارداپ شەگەدى.
5. ب ب ق (باد) ءىشۋ جايلى دارىگەر كەڭەسىن الىڭىز
زاماناۋي قاربالاس زاماندا ميعا ءومىر ءسۇرۋ قيىن. سوندىقتان مي جۇمىسىن قوسىمشا قوسپالار ارقىلى جاقسارتۋعا بولادى. مىسالى، ۆ6, ۆ9 جانە ۆ12 دارۋمەندەرى، ە دارۋمەنى جانە ومەگا-3 ماي قىشقىلدارى مي جۇمىسىنا پايدالى. الايدا مۇنداي قوسپالاردى وزدىگىنەن ءىشۋ قاۋىپتى. مىندەتتى تۇردە دارىگەر كەڭەسى قاجەت. دارىگەر اناليز ناتيجەسىنە قاراپ، اعزاڭىزعا ول قاجەت پە، جوق پا انىقتايدى.
ەسكە سالايىق، بۇعان دەيىن قازاقستاندىق تەراپيەۆت نەلىكتەن «باد»- تى دارىگەر كەڭەسىنسىز ىشۋگە بولمايتىنىن ايتقان بولاتىن.