تيرانا مەديتسينالىق ۋنيۆەرسيتەتىنىڭ ستۋدەنتتەرى پارلامەنت عيماراتى الدىنداعى نارازىلىق شەرۋىندە جاڭا وقۋ جىلىنا بويكوت جاريالادى. ولار وقۋىن بىتىرگەن سوڭ البانيادا 5 جىل جۇمىس ىستەۋگە مىندەتتەيتىن زاڭنىڭ جويىلۋىن تالاپ ەتىپ وتىر.
«بۇل زاڭ جوباسى ادىلەتسىز جانە كونستيتۋتسياعا قايشى، ول ادام قۇقىعىن بۇزادى»، - دەيدى نارازىلىق بىلدىرۋشىلەردىڭ ءبىرى.
ءبىلىم مينيسترلىگىنىڭ مۇنداي شەشىم قابىلداۋىنىڭ باستى سەبەبى - اقىل- ويدىڭ كەتۋى. ەۋروپاداعى البانيالىق دارىگەرلەر قاۋىمداستىعى جاريالاعان مالىمەتتەرگە سايكەس، تەك سوڭعى ونجىلدىقتا 3040 دارىگەر ەلدەن كوشىپ كەتكەن.
«زاڭ كونستيتۋتسياعا قايشى ەمەس، زاڭ ەشكىمدى ماجبۇرلەمەيدى. زاڭ تاڭداۋ بەرەدى»، - دەيدى البانيانىڭ ءبىلىم جانە سپورت ءمينيسترى ەۆيس كۋشي.
الايدا بۇل شەشىم مەديتسينا ستۋدەنتتەرىنە ۇنامادى. ولاردىڭ الدىندا ەكى نۇسقا تۇر: نە كەلىسىمشارتقا وتىرۋ، نە وقۋ اقىسىن تولىعىمەن تولەۋ.
دارىگەرلەر ستۋدەنتتەردى البانيادا قالدىرۋدىڭ بالاما جولدارىن تابۋ كەرەك دەيدى.
«ستۋدەنتتەرگە جۇمىس ىستەۋگە جاعداي جاسالۋى كەرەك. مۇنداي شارالار بۇكىل الەمدە قابىلدانۋدا»، - دەيدى دارىگەر كيتا ساللاباندا.
ءبىر ايدان استام ۋاقىتقا سوزىلعان نارازىلىقتار ازىرگە ناتيجە بەرمەدى: پارلامەنت قازان ايىندا جاڭا وقۋ جىلىنان باستاپ قولدانىسقا ەنگىزىلۋى ءتيىس زاڭ جوباسىن ماقۇلدادى.