رامازان ايىندا ماڭعىستاۋ مەشىتتەرىندە كۇن سايىن 5 مىڭعا جۋىق ادامعا اۋىزاشار بەرىلەدى
ال وبلىستىق «بەكەت اتا» مەشىتى جانىندا ارنايى اۋىزاشار شاتىرى تىگىلەدى. وندا كۇندە 400 كىسىگە اۋىزاشار داستارقانى جايىلادى، دەپ حابارلايدى قازاقپارات ءتىلشىسى.
«رامازان ايى - اللاعا قۇلشىلىق ەتۋگە، ىزگى امالدار ىستەۋگە، بويداعى يماندى كۇشەيتۋگە مۇمكىندىك بەرەتىن اسا بەرەكەلى اي. بيىل وڭىرىمىزدەگى 40 مەشىتتىڭ 20 سىندا تاراۋىق نامازى، حاتىم قۇران وقىلادى» دەدى ماڭعىستاۋ وبلىستىق بەكەت اتا مەشىتىنىڭ باس يمامى ءانۋار ەلجانوۆ.
قازاقستان مۇسىلماندارى ءدىني باسقارماسى ءساۋىر ايىنىڭ 17 نەن 18 نە قاراعان ءتۇنىن قاسيەتتى قادىر ءتۇنى دەپ بەلگىلەگەن. ال 21-ءساۋىر - ورازا ايت مەرەكەسى. سونداي-اق، ءپىتىر ساداقانىڭ مولشەرى ەلىمىز بويىنشا 2 كەلى ۇننىڭ ورتاشا باعاسىمەن ەسەپتەلگەن.
«بيىل ءپىتىر ساداقانىڭ مولشەرى - 535 تەڭگە. داۋلەتتى ادامدار ساداقانى قۇرما، مەيىز باعاسىمەن دە بەرۋىنە بولادى. ءپىديا(فيديا) تولەۋگە شاماسى كەلمەيتىن مۇسىلماندار ءپىتىر قۇنىمەن دە ءپىديا بەرە الادى. وسى رەتتە كاسىپكەر ازاماتتاردى، ساۋدا ورتالىقتارىنىڭ باسشىلارىن قاسيەتتى ايدىڭ قۇرمەتى ءۇشىن حالقىمىزدىڭ تۇرمىس جاعدايىن ەسكەرىپ، الەۋمەتتىك ماڭىزى بار تاۋارلار مەن ازىق-تۇلىك باعاسىن مۇمكىندىگىنشە 10 پايىزعا دەيىن تومەندەتىپ، جەڭىلدىك جاساۋعا شاقىرامىن»، - دەدى وبلىستىڭ باس يمامى.