استانا مەن 5 وڭىردە پايدالانۋعا بەرىلگەن باسپانا سانى ازايدى
قازاقپارات بۇل تۋرالى ۇلتتىق ستاتيستيكا بيۋروسىنا سىلتەمە جاساپ حابارلايدى.
«تۇرعىن ۇيلەردى پايدالانۋعا بەرۋدىڭ ءوسىمى رەسپۋبليكانىڭ 14 وڭىرىندە بايقالدى. ءوسۋ قارقىنى بويىنشا پاۆلودار (32,1 پايىز)، شىعىس قازاقستان (15,4 پايىز) جانە جەتىسۋ وبلىستارى (8,8 پايىز) كوش باستاپ تۇر.
بۇل رەتتە پايدالانۋعا بەرىلگەن تۇرعىن ءۇي كولەمىنىڭ تومەندەۋى ۇلىتاۋ (29,6 پايىز)، ماڭعىستاۋ (15,1 پايىز)، سولتۇستىك قازاقستان (13,1 پايىز) جانە اتىراۋ (7,8 پايىز) وبلىستارىندا، سونداي-اق استانا (24,7 پايىز) مەن الماتى (34,6 پايىز) قالالارىندا بايقالدى»، - دەلىنگەن ستاتيستيكا مالىمەتىندە.
2022-جىلعى قاڭتار-جەلتوقساندا پايدالانۋعا بەرىلگەن باسپانالاردىڭ جالپى الاڭى 8,8 پايىز ازايدى. اتاپ ايتقاندا، كوپپاتەرلى 1540 ءۇي قولدانىسقا بەرىلدى، بۇل 2021-جىلعى كولەمنىڭ - 91,5 پايىز. پايدالانۋعا بەرىلگەن جەكە ۇيلەر سانى – 36365، بۇل بىلتىرعى كولەمنىڭ - 92,6 پايىز.
بىلتىرعى قاڭتار-جەلتوقسان ايلارى ارالىعىندا تۇرعىن ۇيلەردىڭ جالپى الاڭىنىڭ ءبىر شارشى مەتر قۇرىلىسىنا جۇمسالعان ناقتى ورتاشا شىعىن 12,2 پايىز ءوستى.